MZP-in Zophaiah chawlhbûk sak an la tum

MZP chuan thuchhuah siamin, Bairabi Zophai hmun­ah MZP-in Zofate Chawlh­bûk sak a la tum reng tih an tarlang a, "MZP chu a dinna ngaiah a la ding reng a, Zofate Chawlhbuk hi sak chhunzawm leh turin a rêl a ni," an ti.

MZP chuan, nikum March 8 leh 10-ah Zophaia Zofate Chawlhbuk sak an tum laiin Assam Police nen innawr buaina avangin tun thlengin an sa ta rih lo tih sawiin, "Sorkar hmasa lakah MZP a bei dawn hnuin, Mizoram sorkar thar a pian ve leh Chief Minister leh Home Minister bulah lehkha pek a nih bakah, ṭawngkáa vawi tam tak a sawipui a ni," an ti a; Bairabi bialtu MLA pawh an sawipui tawh niin an tarlang.

Assam leh Mizoram ramri enfeltu tur Core Committee pawh din thar leh turin sorkar an ngen tih sawiin MZP chuan, "Tun thlenga ramri ngaihtuahtu tur Core Committee din thar a ni lo hi, sorkar hian ramri a vei lo hleah kan ngai. Zirlaite'n vuak an tawrhna, silai hiala kah an tawrhna leh thisen hial a luan tawhna Assam leh Mizoram ramri hi Mizoram sorkar hian tun ai hian vei se a duh hle a ni," an ti.

MZP chuan, tun March thla chhung ngeiin Bairabi Zophaia Zofate Chawlhbuk sakna tur enfiah turin Zo­phaia kal an tum thu an tarlang bawk.