Vawiinah budget session

Mizoram state Legislative Assembly pariatna session ṭum hnihna, budget session ni nghal bawk chu vawiin chawhma dar 10:30-ah ṭan a ni dawn a, March 20, 2019 thleng a awh ang.

Vawiin session-ah hian Governor Prof. Jagdish Mukhi-a'n thu a sawi dawn a; Governor thusawia lawmthu sawina motion put luh a nih hnuah session tihtawp a ni ang. Naktukah session hnuhnung ber leh tun session inkara MP leh MLA thite sûnna hun hman a ni dawn a, chumi hnuah Governor thusawi sawiho tur a ni.

March 14, 15 leh 18 chu zawhna leh chhana hun atan leh sorkar thil pawimawhte tihna hun atan hman a ni ang a; March 17 & 18 chu chawlh a ni dawn a, March 19-ah Supplementary Demands pharh tur niin, session tàwp ní-ah vote on account hmangin budget pass a ni ang.

Tun ṭum session atan hian bill paruk, private member resolution 44, zawhna House-a chhan chi 139 leh ziaka chhan chi 40 a lut a; paper pariat pharh a ni dawn a, Comptroller & Auditor General of India report pharh a ni dawn bawk.