KHAWTHLIR

MZU-ah workshop
Mizoram University-a Department of Library & Information Science leh Information & Library Network Centre (INFLIBNET Centre), Gandhinagar, Gujarat-te chuan DRDO, New Delhi leh ICSSR-NERC, Shillong bultumin nimin khan MZU-ah 'Trends in LIS Research: Approaches and Methods' tih thupui hmangin national level workshop an buatsaih. MZU vice chancellor Prof. KRS Sambasiva Rao chu khuallian niin, Banaras Hindu University-a mi Prof. HN Prasad leh Prof. NVR Jyoti Kumar te chu khualzahawm an ni.

Rakzu man
Mamita Excise & Narcotics enforcement leh YMA sub-headquarters-te chu March 10, Pathianni khan NH-44A kawngpuiah an duty a, kawngpuia tlan lirthei an endikna aṭangin rakzu fûn 34 leh ganja fûn 45 an man. Ruihhlo an man kaihhnawiah mi 16 chu intiamkamna ziahtir an ni a, Excise & Narcotics leh YMA mi leh sate bakah, an chhungte ṭheuh hriatpuituah an ṭang a ni.

ZPM meeting
Zoram Peoples' Movement (ZPM) Legislature Party member-te leh ZPM Caucus member-te chu nimin khan an pawl pisaah an ṭhukhawm a; Lok Sabha inthlanpui leh Aizawl West-I biala Assembly bye-election awm tur chungchang an thlirho.

Glaucoma Week
Eye Care Community & Research Centre, Dawrpui leh Aizawl West district Chief Medical Officer bultumin nimin aṭang khan World Glaucoma Week hman ṭan a ni a, tun March 18 thleng a awh ang. World Glaucoma Week 2019 thupui chu 'Beat invisible glaucoma' tih a ni a, Week pual hian MUP member 70-te a thlawna tarmit pek an ni.

Lawmpuina hlan
Tuivai Kual Zirlai Pawl chuan an bialtu MLA Lalrinliana Sailo, Assembly speaker chu nimin khan a pisaah hmuin, lawmpuina thilpek an hlan. Lalrinliana Sailo chuan, a bial chhung tana a hmachhawp hrang hrangte leh hmalak a tum dante a lo hrilh. Tuivai Kual Zirlai Pawl hi kum 2016-ah din a ni a; Daido, NE Tlangnuam, Khawlian leh Phuaibuang khuate a huam a ni.