BCM-in Kristiante hunpui tibuai thei zawnga Programme siam lo tura sorkar ngen an rêl

March 6-10, 2019 chhunga Lunglei Venglai BCM Kohhran biak-ina neih zawh tâk, Baptist Church of Mizoram (BCM) rorelna sang ber, BCM Assembly vawi 123-na chuan 'Kristiante'n kan hunpui, Krismas leh Good Friday bawh buai thei zawnga programme siam lo turin Central sorkara thlen turin Mizoram sorkarah ngen ni se," an ti.

BCM Assembly rorel inkhawm hi March 7-9 chhung neih a ni a, BCM president Rev. PC Liandula'n kaihruaiin, rorel palai 1,086 an kal. Mission field thar Odisha Field hawn te, non Mizo Mission rawngbawlna tihlen te, Sidya Baptist Association nen thawhhona thuthlung siamte leh Planning Commission dinte an rel a; Pay Commision Report an pawm a, Missionary Supporters Policy an siamṭhat bakah, Mission Field tlawh dan inkaihhruaina an siam thar.

Inkhawmpui rorelna chuan, "BCM chhungkuate ei leh bar leh sum leh pai chungchangah hma kan sawn theih nan BCM hian Economic Development Policy siam se, pastor bial tinah chak takin hmalak ni se," an ti bawk.

An thurel dang zingah, Serkawna Nursing School chu college-ah hlankai te, non Mizo rawngbawlnaah director hran nei enkawl te, HATIM-ah elective paper chu core paper-a hlankai leh elective paper atan Education leh Pshychology dah belh te, Chanchin Ṭha thlen dan documentary film ṭha tak siam te, BCM-in pastor quarters sakna a pek ṭhin Rs. 10,00,000 chu Rs. 15,00,000-ah tihpunte a tel.

Kum 2019-22 kum chhunga BCM puipa turte an thlang a; president (elect) chu Rev. Dr K Lalrinthanga a ni. General secretary atan Rev. F Ramdinmawia, assistant general secretary (i/c Mission) atan Rev.Dr C Vanlaldika, assistant general secretary (i/c Service) atan Rev. R Lalbiakliana leh, executive secretary atan Rev.Dr Lalthanmawia (Aizawl) leh Rev. R Lalnunzira (Lawngtlai)-te an thlang.

Kum 2019-2020 budget atan cheng nuai 9490.40 an pawm a; chu'ngte chu Central-ah nuai 3247.97, Mission-ah nuai 2993.25 leh Service-ah nuai 3249.18-ahte ṭhen a ni. Budget pumpui zinga nuai 6312.37 chu kohhran thawhlawwm aṭanga hmuh beisei a ni a, nuai 3178.03 chu department thawh chhuah tura beisei a ni. Budget hi kum 2018-19 budget aiin cheng nuai 1,145.73 (13.73%)-in a tam zawk.

Kum 2020-a BCM Assembly neihna tur chu Lunglei Rahsi Veng biak-in a ni a; kum 2021-ah Lunglei Ramthar Veng biak-inah nghah a ni ang.