BJP leh an thurualpuite vote loh a ngai - ZPM Sr. Vice Chairman

ZPM senior vice chairman Dr Kenneth Chawngliana chuan nimin khan an pawl pisaa inkhawmah thu a sawi a; BJP-in sorkarna an siam leh chuan Citizenship (Amendment) Bill pass ngei an la tum avangin, Lok Sabha inthlan awm turah mipuiin BJP leh an thawhpuite an vote loh a ngaih thu a sawi.

Dr Kenneth Chawng­liana chuan, "BJP presi­dent Amit Shah chuan Lok Sabha inthlan­puiah an chak a, BJP an sorkar chuan Citizenship Amendment Bill an pass ngei dawn thu a sawi. Hei vang hian Mizo mipui zawng zawngte'n Lok Sabha inthlannaah hian BJP leh a sangawi zawnpuite kan vote tlin loh a ṭul tak zet a ni," a ti.

Kenneth Chawngliana chuan, "ZPM chuan BJP duh dana bán phar ve lo tur MP thlang chhuak ngei turin Mizo mipui zawng zawng kan sáwm a ni," a ti a; Mizoram ṭhalaite zinga Citizenship Amendment Bill vanga Mizo nationalism-a harh tharna a thleng chu lawmawm a tih thu a sawi.

ZPM Senior Vice Pre­sident chuan, Mizorama mihring pun chakna chhan chu dan loa Mizorama lo lut (illegal imigrant) Chakma leh Bru-te vang a nih thu a sawi a, "Hei hi kan sorkar lo hrawn tawhte'n an ngaihthah vang a ni. Mizorama sorkar kan neih tawhte zingah Brig. Thenphunga kaihhruai PC party-te chauh kha hma latu awmchhun an ni," a ti.

Dr Kenneth Chawng­liana chuan, ZONET Cable TV managing director RK Lianzuala’n chatuan ram a pan ta chu a uizia leh Zo fate tan chânna nasa tak a nih thu a sawi bawk.