Aizawl dist.-ah polling station 331 a awm

Aizawl district election officer (DEO) Vanlalngaihsaka, Aizawl district bawrhsap ni bawk chuan, April 11, 2019-a Lok Sabha inthlanpui awm turah Aizawl district-ah polling station 331 a awm dawn thu a sawi.

Vanlalngaihsaka hian nimin khan Aizawl DC conference hall-ah thuthar thehdarhtute a kâwm a; MLA inthlan neih zawh takah khan Aizawl district-ah polling station 328 a awm thu sawiin, "Lok Sabha inthlan atan hian polling station pathum siam belh kan dil a, min phalsak. Polling station thar pathum nen hian polling station 331 a awm dawn a ni," a ti.

Aizawl DEO sawi danin, tun ṭum Lok Sabha inthlan atan hian critical polling station puan a awm lo a, vulberable area-ah Zokhawthiang, Daido leh NE Tlangnuamte chu puan a ni.

Tun ṭumah hian hmeichhe hlang duty-na polling station (pink polling station) Aizawl khawpuiah 34 siam a ni dawn a, web casting polling station pawh Aizawlah vek 30 siam a ni ang.

February 22, 2019-a electoral roll tihchhuah ang chuan, Aizawl district-ah hian voter 2,94,766 an awm a, hmeichhia 1,55,235 leh mipa 1,39,531 an ni. Lok Sabha inthlana vote tlate chu Assembly Annexe-ah chhiar tum a ni a, Aizawl West-I MLA bye-election-a vote tlate chu Govt. Aizawl College-ah chhiar tum a ni.