Lengpui Airport hi MNF kutchhuak - J Lalhmingliana

GAD Aviation Wing-a principal consultant Wg.Cdr. J Lalhmingliana, MNF party-a adviser ni bawk chuan nimin khan Mizo Hnam Rûna inkhawmah thu sawiin, Lengpui Airport chu MNF sorkar kutchhuak niin a sawi. Lengpui Airport hi December 12, 1998-ah MNF ministry a pian thar hnu lawka hawn a ni.

J Lalhmingliana chuan, Mizoram state a nih hnu lawk, kum 1987-ah amah chu chief minister Laldenga'n a ko a,. Tuirial Airfield aia lian leh changtlung zawk thlawhna ṭumhmun Mizoramin a mamawh tih hriain, airport neih dan tur buaipui a, thla thum chhunga report pe turin a ti niin a sawi a, "Kan survey ta a. Kan hmalaknate kha nuihza siam nan min hmang hial a ni. Airport hmun tur hmun thum kan en zingah Lengpui chu pawm a ni ta a ni," a ti.

MNF sorkar lai, kum 1998-2008 chhungin MNF sorkarin Lengpui Airport tihchangtlun nan nasa takin hma a la nia sawiin J Lalhmingliana chuan, "Khatih laia Union Aviation Minister kha Pu Zoramthanga hian a ngen nasa hle a ni," a ti. Lengpui Airport chu mini international airport-ah siam an tum thu leh, Airport Authourity of India kuta awm lo a, Mizoram sorkar kuta a awm a ṭul thu a sawi bawk.