Assam-ah Covid-19 kai tam avangin Mizorama luh tum an tam phah lo

Vanglaini palai zawhna chhangin Kolasib SP Vanlalfaka chuan, Assam-ah Covid-19 kai hmuh chhuah an tam tâk avangin Mizorama luh tum an tam phah loh thu a sawi a, "Thil a danglam phah lo. Mizorama hnam dangte pawhin an hlau ve a, mikhual neih an duh bik lo. An chhungte Assam lama awm mekte pawh Mizorama let rih lo turin an hriattir zawk," a ti. Kolasib SP sawi danin, Covid-19 a lên hnuah an district chhunga checkgate pangngai awm sa bakah check point dang - Vairengte lamah hmun parukah, Bairabi lamah hmun pangaah leh Saiphai lamah hmun parukah siamin duty mek a ni. Duty post siam belhah hian police leh local task force-te an duty ṭhin a, mipui ni tin mamawh phur leh sorkarin hmasawnna hna a thawhna tur bungraw phurte bak state dang aṭangin Mizoramah luh phal a ni lo.

Vairengte Joint YMA president H Lalnunmawia pawhin, Assam-a Covid-19 kai hmuh chhuah an tam avangin Mizorama luh tum an tam phah loh thu a sawi a, "Hmun hrang hrangah duty kan indah a, zan riaka duty-te an awm. Police-te nen kan duty a, anni lam hi an indaih lo deuh. State páwn aṭangin mipui ni tin mamawh phur bâk luh kan phal lo a, chutiang lirthei bak chu veivâk an awm meuh lo," a ti.

Mizoram hnaih Assam khaw ṭhenkhatah sipaia thawk an awm nual thu sawiin H Lalnunmawia chuan, "Anni pawh veivâk loa sipai camp-a inkulh mai turin kan ti a, thu an âwih hle," a ti a, Assam lamah natna kai an tam tawh avangin fi mkhur zual a ṭul thu a sawi. Vairengte Jt. YMA president chuan, mipui ni tin mamawh phur lirthei khalhtute chu Vairengte checkgate lamah an hriselna dinhmun endik reng a nih thu sawiin, "Uluk taka endik turin kan inchah reng. Tun hma anga lirthei veivâk luih luih a ni tawh lo a, a awlsam deuh tawh," a ti.

Mizo zingah Assam lama kal tum an awm leh ṭhin thu sawiin H Lalnunmawia chuan, "A bik takin bungraw la tura Assam-a kal tum an awm leh ṭhin. Tu mah kaltlang kan phal lo a, kan kirtîr leh ṭhin," a ti. Bairabi awmna Zampuimanga Group YMA president H Lalzawmliana chuan, Assam-a Covid-19 kai hmuh chhuah an tam vangin Mizorama rawn luh tum an tam phah loh thu Vanglaini palai zawhna chhangin a sawi bawk a, "State páwn aṭanga rawn luh hrim hrim kan phal tawh lo," a ti a; Bairabi leh a chhehvel leileta hna thawkte pawh Mizoram an luh an phal tawh loh thu a sawi.

H Lalzawmliana chuan, bungraw phur lirtheite chu kaltlangtir an nih thu sawiin, "Bairabia dah tur bungruate chu darkar 72 chhung kudama dah a nih hma chuan Bairabi mipuiin kan khawih lo. Bungraw phur motor-te pawh an hlànthlak zawh veleh hawtir leh nghal an ni. Mizoram hmun danga dah tur bungruate erawhin kan khua an tlan pêl nghal ṭhin," a ti. Group YMA President sawi danin, khualzin phur rél a tlân tawh lo a, rélin bungrua a phurhte pawh ni khat chhung nisáa pho hma chu driver leh thawktute'n an khawih duh lo. Hei hi hriain Kolasib DC pisa lamin rél wagon-te pawh damdawi-in an kap a ni.

Bairabi piah lawk Assamah ruihhlo lei tur a tam a, chu vang chuan kal tum an awm ṭhin. Ruihhlo la tura kal an awm lohna atan hmun 16 velah duty-na an siam a, zing dar 9 aṭanga zan dar 10 thleng local task force-te duty in, zan dan 10 aṭanga zing dar 9 thleng police an duty thung. Bairabi khaw mi ni lo ruihhlo lak tumte chu hawtir leh ṭhin an ni.