Assembly Budget Session ṭan a ni SEDP hi a sema sem tur a ni lo - Larsap

Mizoram state Legislative Assembly pariatna session ṭum hnihna, budget session chu nimin khan ṭan a ni. Session ṭan ní-ah hian Governor Prof. Jagdish Mukhi chuan thu sawiin, Mizoram sorkar flagship programme Socio Economic Developmemnt Policy (SEDP) chu a sema sem tur a nih loh thu a sawi.

Larsap chuan, flagship programme thar SEDP hmangin Mizoramin hmasawnna kawng thar a zawh thuai dawn nia sawiin, "SEDP hian state-in theihna a neihna sector pawimawh zawng zawngah hmasawnna leh ṭhanna a thlen dawn. He policy-in a tum ber chu, Mizoram hi welfare state dik taka siam a, intodelh, hmasawnna huap zau leh ngêlnghet, sorkar langtlang leh hna thawk nasaa siam a tum a ni," a ti.

Governor sawi danin, SEDP hnuaiah Political & Administrative Policy, Economic Development Policy leh Social Development Policy-te siam a ni dawn a; state chhunga hmasawnna hna hrang hrang thawkte enpuitu tur Apex Body din thuai a ni ang.

Socio-economic sector hnuaia committee 14-te hnenah an kaihhnawih department-te nen thawkho a, an sector ṭheuha hmasawnna hna thawh dan tur action plan siam tura hriattir an ni. SEDP chu sorkar hmasaa programme dangte ang ni loin, miretheite hnena thilpek a ni lo a, mipui hmalakna kawnga anmahni puitu tur a ni.

Prof. Jagdish Mukhi chuan, Mizoram chu state tê zingah entrepreneurship lama hmasawn bera thlan a nih thu a sawi a, "Hei hi remchangah hmangin sorkar chuan professional leh vocational lama ṭhalaite'n hma an sawn zel theihna atan theihtawp chhuah zel a tum a ni," a ti.

Mizoram ruihhlo ngai an tam leh ruihhlo tawlhrûk chu sorkarin a ngai pawimawh hle tih sawiin Larsap chuan, "Chuvangin, MLPC Act, 2015 thlakna tur bill chu tun ṭum session-ah hian pharh a ni ang," a ti a; hmei­chhia leh naupang tawlhrûk venna atan pawh sorkarin theihtawp a chhuah tur thu a sawi.

Jagdish Mukhi chuan, Mizo nihphung, tradition leh ngaihhlut záwngte chu vawnhim leh chawisang turin sorkar chu a intiam tih sawiin, "India leh ram danga Mizote'n in­unauna ṭha zawk an neih theihna atan sor­karin theihtawp a chhuah dawn a ni," a ti.

Governor thusawi chungchanga lawmthu sawina Motion of Thanks chu MNF member Prof. F Lalnunmawia'n a pu lut a, vawiin hian Governor thusawi chu sawiho a ni ang.