Ramri bulah bomb rah puah a ni

March 11, Thawhṭanni zing dar 7 vel khan Mizoram chhim tawp lam, Myanmar ramri hnaiha khaw pakhat, Bangdukbanga khuaa mi Biranda Kumar chuan ramah rahpuah bomb (land mine) a rap puak a, hliam tuarin, nimin khan Lawngtlai District Hospital leh Lunglei Civil Hospital thlenpui a ni.

Lawngtlai aṭanga thu dawn danin, Bangdukbanga hi India leh Myanmar inrina, Burma ram dep, Tuichawng lui kama awm, Chakma Autonomous District Council (CADC) huam chhung a ni a, a mi chengte chu Chakma-ah pawh Tongchongya hnam an ni.

Thawhṭanni zing kar khan Biranda Kumar leh a ṭhiante pali - mipa pathum leh hmeichhia pakhatte chu chawhmeh zawngin ramah an kal a, ramri lung (Pillar No. 2) bul lawk, India ram chhung chinah Biranda Kumar chuan bomb a rap puak a ni. Bomb chu a thawk na viau a, Biranda Kumar chu na takin a hliam a ni.

Biranda Kumar hi nimin zing dar 4 vel khan Lawngtlai District Hospital thlenpui a ni a, thisen unit hnih pek nghal a ni. Nimin vek khan Assam Rifle ambulance-in Lung­lei Civil Hospital panpui leh nghal.

Biranda Kumar kalpuitute chuan, Biranda Kumar-a bomb rah puah chu Myanmar sipai kam nge, Arakan Army-te kam tihah rin dan an neih loh thu leh, bomb chu siam chawp a nih an rin thu an sawi a; mi dang hliam an awm loh thu an sawi bawk.

Myanmar sipai leh Arakan Army-te Myanmar ram chhungah an inkâp nia sawi a ni a, chutih laiin, India sorkar chuan Mizoram leh Myanmar inrina bawr vel­ah sipai - Assam Rifle, BSF leh SIB-te a dah mek. Sipai te chuan tualchhung mite chu rama chhuak tam lo turin an ti a, mahse, tualchhung mite chu khawsak harsa tak tak, ni tin eichawp zawng an nih avangin ramah ei tur an dap a ngai niin Lawngtlai aṭanga thu dawnna chuan a sawi.

Ramri dep khuaa India sipai awm ṭhenkhat chuan an duty-na hmun an chhuahsan tawh a, chutih laiin, ven uluk ngai zual (sensitive area)-ah erawh chuan an la awm reng thung. Bangdukbanga khuaah pawh India sipaite an la awm a, tualchhung mite lût leh chhuak tur pawh an identity card uluk takin an la endiksak ṭhin. Aadhaar card nei lo phei chu luh leh chhuah an phalsak lo nia thu dawn a ni.

January 15, 2018 khan Bangdukbanga khuaa mi tho, Jitua Tongchongya chuan ramri hnaiah bomb a rap puak tawh a, na takin a hliam. Nikum January 18 khan Kâwn khuaa Khusoma pawhin bomb rap puak bawk a, a thih phah a ni.