Sports Minister leh NCC hotu inkâwm

NCC (Shillong) additional director general Brig. RK Singh chuan nimin khan Sports & Youth Services minister Robert Romawia Royte chu a pisaah a kâwm a; Mizo ṭhalaite National Cadet Corps (NCC) leh sport hmanga tihhma­sawn dan tur an sawi dûn.

Robert Romawia chuan, ṭhalaite ruihhlo leh zûk leh hmuama an filhim theihna atan te, eizawnna mumal leh nun kawng dik an zawh theihna atante leh, vantlang nun honaa Mizo nun mawi leh pangngai tak an chawi nun leh theihna tura hmanraw pawimawh chu infiamna a nih thu a sawi.

Sports Minister chuan, sport chu hnam leh hnam, sakhua leh sakhua, chi leh chi, hausa leh rethei inthliar hranna awm loa India khua leh tuite pumkhata siamtu a nih thu a sawi a; Brig. RK Singh chu NCC-ah tun aia sport lam uar turin a ngen.

Brig. RK Singh chuan, NCC hma­sawnna tura rawtna hrang hrang a neihte Sports Minister a sawipui a; Mizorama NCC hmalak meknaa harsatna an tawhte Sports Minister-in a hriatthiampui leh inhawng taka puih a inhuam chu lawmawm a tih thu a hrilh.

Sports Minister leh NCC Addl. DG hian NCC football team din chungchang te, Lungleia NCC bultuma football tour­nament buatsaihte leh, silai kah lama ṭhalaite hamṭhatna tura chak zawka kalpui dan turte an sawi dun a ni.