MNF party hi Delhi-a BJP/NDA em em, Mizoramah insawi fihlîm tum an ni - BJP Mizoram President

BJP Mizoram President Prof. JV Hluna chuan, April 11, 2019-a Lok Sabha inthlanpui leh Assembly bye-election-ah candidate neih ngei an tum thu a puang. MNF party chu Delhi-ah an BJP/NDA em em a, Mizoram chhungah erawh chuan BJP/NDA aṭangin insawi fihlim an tum char char thung niin a sawi.

Prof. JV Hluna chuan, "Kan state-ah hian Mizoram páwn leh Delhi tlánga NDA/BJP em em, Mizoram chhunga NDA/ BJP-a insawi fihlîm tum leh em em, lehlama awrsen, lehlam awrdum - MNF party sorkar kan hrawn mek a ni," a ti.

JV Hluna chuan, MNF-in sor­karna an siam veleh an president Zoramthanga chuan Central-a BJP hruaitute be nghalin, NDA aṭanga an chhuah loh thu a hrilh nghal tih a sawi a, "A hnuah kar khat vel a zin thla a, minister hrang hrangte chu NDA leh NEDA an la zawm thu a hrilh," a ti a; candidate an set chiah aṭangin MNF dinhmun a hriat tur thu a sawi.

NDA leh NEDA-a tel inti siin MNF sorkar chuan Mizorama BJP MLA an hlamchhiah tih sawiin JV Hluna chuan, "NEDA/NDA-a an tel a nih chuan MNF sorkar hian House-ah kan MLA hi treasury bench-ah an ṭhuttir ve tur a ni," a ti.

MNF sorkarin an nihphung aṭangin Mizote leh Mizoram mamawh development an sawi chhuak mai dawn lo tih an hmu tlang sa nia sawiin JV Hluna chuan, "Central-ah eng vang pawhin BJP kaihhruai NDA a sorkar leh dawn avangin BJP, Mizoram state chuan BJP MP kan neih chuan kan state sorkar leh mipuite tan kan thawk hlâwk zawkin kan ring," a ti a; Mizoram aṭangin BJP MP thlan tlin a nih chuan, minister a nih theih nan Mizoram BJP-in mawh an phurh tur thu a sawi.

Mizoram BJP President sawi danin, April 11, 2019-a Lok Sabha inthlanpui leh state Assembly-a Aizawl West-I biala bye-election awm turah BJP-in official candidate an nei dawn a; inthlan buaipui turin Mizoram BJP President kaihhruai committee an din a ni.