KHAWTHLIR

Thisen pe
Secretariat chuan nimin khan Secretariat building kawtah blood donation camp an huaihawt chhunzawm a, Aizawl Civil Hospital tan mipa 18 leh hmeichhia pakhatin thisen unit 19 an pe. Secretariat-in blood donation camp an huaihawtah hian March 12 khan thisen unit 38 an lo pe tawh a, nimina mi nen ni hnih chhungin thisen unit 57 an pe a ni.

Tlân theih loh hun
PWD-in March 13 aṭanga April 13, 2019 thleng Muallungthu leh Khumtung inkar kawng siam hna an thawh leh dawn avangin, he kawngah hian lirthei tlan theih hun leh tlan theih loh hun siam a nih thu, sorkar thuchhuahin a tarlang. Lirthei tlan theih loh hunte chu - Ṭhawhtanni aṭanga Inrinni thlengin zing dar 8 aṭanga chhun dar 12 inkar leh, chawhnu dar 1:30 aṭanga tlai dar 5 inkar a ni.

Security meeting
Nimin khan Raj Bhavan Durbar Hall-ah Governor Prof. Jagdish Mukhi leh Mizoram sorkara venhimna hna thawktute an ṭhukhawm. Meeting-ah hian chief secretary Lalnunmawia Chuaungo, DGP, IGP (Law & Order), 23 Sector Assam Rifles DIG, BSF DIG, 225 CRPF Commandant leh force lam mi pawimawh dangte an tel a ni.

Lok Ayukta Puitling duh
PRISM party chuan thuchhuah siamin, Mizoram sorkarin Lokayukta a din ta chu lawmawm an tih thu an tarlang a, chutih rualin, Lok Ayukta puitling ngei neih an duh thu an puang. PRISM chuan, "Lok Ayukta-ah hian chairman bakah member pahnih awm tur a ni a, hna tak tak a thawh theihna turin Lok Ayukta hi full body-a a awm ngei a ngai a, member dang pahnih ruat thuai turin Mizoram sorkar kan ngen a ni," an ti.

CM Relief Fund
Chief Ministers' Relief Fund-ah Mizoram Iskut Growers’ Association, Sihphir chuan tun hnai khan Rs. 20,000 an chhûng lut a, Chhawkhlei Welfare Committee, Ṭhuampui pawhin Rs. 2,500 an chhûng lut bawk. Chief Minister chuan, Relief Fund petute chungah lawmthu a sawi a, sum leh pai chhûn luhte chu ṭangkai taka hman a nih ngei tur thu a tarlang.