KHAWTHLIR
THISEN PE
Lunglei College NSS volunteer-te chuan nimin khan Lunglei Civil Hospital blood bank-ah thisen unit 17 an pe a, petute mipa 16 leh hmeichhia pakhat an ni. Serkawn Higher Secondary School NSS volunteer mipa pali leh hmeichhia pahnihte pawhin Christian Hospital-ah thisen an pe bawk.
ATC HELPLINE
Aizawl Theological College (ATC) chuan Covid-19 léng vanga rilru leh thlarau lama puih ngaite tan phone hmanga biak leh inṭanpuina turin helpline an siam. Rilru leh thlarau lama ṭanpui mamawh nia inhriate chu inthlahrung loa helpline be turin an chah a, "Helpline hmanga rawngbawlna hi Pathian chauh rin chhan leh ṭawngṭaina nena kalpui zel tur a ni," an ti. ATC Covid-19 Helpline number-te chu 9436353745, 9485140303 leh 8787566340-te a ni.
NSS HNATLANG
Covid-19 laka invenna atana Mizoram páwn aṭanga zin haw ṭhenkhatte khung hranna (quarantine centre) R Dengṭhuama Hall-a awmte ei leh in tur sema duty Pachhunga University College (PUC) NSS volunteer-te chuan nimin khan hall kawt leh a chhehvel thenfai hnatlang an nei a, NSS PO Dr Zoramdinthara leh Dr Lalmuanpuia Vanchhawng ten an ṭawiawm. PUC hian nimin khan College Veng LTF-te hnenah Rs. 20,000 an hlân bawk.
SHG-IN HLAN
Zawlnuam RD block chhunga MzSRLM hnuai a Kawrthah, Rengdil leh Zamuanga self help group-te'n kuhva káwr aṭanga an siamte chu Covid-19 vanga sorkarin quarantine centre hrang hranga a khung hrante tan leh a ṭula hman atan Mamit DC Dr Lalrozama hnenah nimin khan an hlân. An thil pekte chu - thlêng 970, fian 200 leh belthlêng (bowl) 500 a ni.
IPR APPLICATION
Covid-19 chungchanga Mizoram sorkar hmalaknate mipui hriat turin Information & Public Relations (IPR) department chuan kawng hrang hrangin a puang chhuak ṭhin a; department website, Facebook page, Instagram leh Twitter-te an hman tawh bakah, mobile phone application an siam thar. Application hi drive.google.com/ open?id=17u8_QS_ P95nho4xKzyIo6XRWPHEJsidT ah download theih a ni.