ASF vangin vawk 771 a thi tawh Sorkar laipuiin ASF lên thu a puang

Sorkar laipui chuan Mizoramah vawk pul hri African Swine Fever (ASF) a lèng tih April 15, Ningani khan a puang ta. Mizoram hmun hrang hrangah tun hnaiah ASF vangin vawk 771 a thi tawh a; Animal Husbandry & Veterinary minister Dr K Beichhua chuan, district pangaah ASF a lêng tih finfiah a nih tawh thu a sawi.

AH&Vety Minister hian nimin khan Aizawla ASF lênna hmun Armed Veng leh Edenthar Vengte a tlawh a; khawtlang hruaitute nen an inkawmnaah thu sawiin, "Mizorama vawk hri léng hi sorkar laipui chuan ASF a nih tih nimin (Ningani) khan a puang chiang tawh. Aizawl, Lunglei, Siaha, Mamit leh Serchhip district aṭanga vawk thi sample endikte chu an positive vek a, sample kan thawn zawng zawng a positive. Kan ram a him ta lo," a ti.

ASF chu AH&Vety department tan ringawt chuan do hneh chi a nih loh thu sawiin Minister chuan, "Nang nang in ti loa kan zavaia ṭan rual hun a ni. A nih loh chuan a darh zel ang a, kan chán nasa dawn. Invên hna thawh a ngai tak zet. Kan zavaiin kan ṭang tlang ang a, kan thunun thei ngei ang, tih hi chona atan i hmang ang u," a ti a; ASF a darh zel loh nana hma la turin a la tlai chhiat loh thu a sawi.

Dr K Beichhua chuan, sor­kar­­na an siam veleh vawk hri Mizorama a luh loh nan leh vawka intodelh a nih theih nan state leh ram páwn aṭanga vawk lak luh an khap thu sawiin, "Kan theihna zawng zawngin ṭan kan la a, a tirah intodelh lo mah ila, lâk luh a nih loh chuan mi tam takin eizawnna atan an hmang dawn tih hi kan ngaihdan a ni. Hun a kal zel a, kan hlim chho hman hle a, tun hun hi kan thleng ta si a ni," a ti.

ASF lèn chhan chu khawtlang zahna nei lo, mahni ṭánghma ringawt hâitute vang a nih thu sawiin K Beichhua chuan, "A rûka dan pawisa loa vawk la luttute hi chhui chhuah an nih ngei theih nan hmalak a ni," a ti a, chhui chhuah a nih chuan dan anga na taka hrem chu an duh thu a sawi.

AH&Vety director Dr H Laltlan­mawia sawi danin, dan loa hmun dang aṭanga vawk la luttu chhui chhuah a nih theih nan DC-te hnenah department-in complaint a thehlut a; Home department aṭangin nodal officer inruatin hmalak a ni bawk. AH&Vety Minister hi veng pahnih bialtu MLA Robert Ro­mawia Royte leh C Lalmuan­puia te, bialtu councillor John Zosang­liana Ralte leh Christina Roluahpuii Sailo bakah department official-te'n an ṭawiawm a ni.

District Magistrate-te thuchhuak
1. District páwn aṭangin vawk, vawk sa, vawk sa rep leh vawk sa aṭanga ei tur (frozen telin) siam reng reng lak luh leh thawn chhuah khap a ni.
2. State páwn aṭanga vawk la lut duh chuan AH&Vety phalna lak hmasak tur.
3. Vawk damlo talh, a sa sêr, rêp emaw thil danga siam danglam leh hralh khap a ni.
4. Vawk damlo thi ruangte hmun danga thehthang loin, thûk takah phûm tur.
5. Vawk hrisel ṭha chauh talh tur a ni.
6. Phalna tel loin mi dang vawk-inah kal phal a ni lo.