KHAWTHLIR

Serchhip bialah Vote thlâk dawn
Serchhip biala Assembly by-election chu vawiin hian neih a ni dawn a, zing dar 7 aṭanga tlai dar 7 thleng vote thlâk hun hawn a ni ang. By-election-ah hian candidate pasarih an awm a; Lalhriatrenga Chhangte (BJP), PC Laltlansanga (INC), Vanlalzawma (MNF), Lalduhoma (ZPM), Vanlalruata (PC) leh Ramhlun Edena (independent)-te an ni. Vote tlate chu May 2, 2021-ah chhiar a ni ang. Serchhip DEO chuan mipuiin vote an thlak ṭheuh theih nan vawiin hi chawlhah a puang a, mimal hnuaia thawkte pawh hlawh tikiam chuang loa chawlh pek tur a ni.

Thisen pe
Siaha College NSS unit chuan nimin khan thisen pek an huaihawt a, Siaha District Hospital-ah thisen unit 13 an pe a, a petute mipa pariat leh hmeichhia panga an ni.

Saihapui-V khâr
Covid-19 thawh hnihna léng mek avangin Assam aṭanga Saihapui-V kaltlanga Mizorama luhna (entry point) chu khâr rih a nih thu, Kolasib District Magistrate-in nimin khan a puang.

Invèn dan tur sawiho
Siaha District Disaster Management Authority chu nimin khan an chairman Kesavan R, bawrhsap hoin an ṭhu a; kumin fûrpui laia chhiatna leh harsatna thleng thei laka invenna leh harsatna thleng theihte sutkian dan tur an sawiho. Siaha DCSO chuan, Siaha district chhunga thingtlang lam kudamah fûr chhung daih tur buhfai dah khâwl vek tawh a nih thu a sawi.

Kawng khâr dawn
Traffic SP Rodingliana Chawngthu chuan, April 19-April 30, 2021 chhungin zing dar 9:30 aṭanga tlai dar 5 inkarah Ramhlun Sports Complex pêng leh Ramthar Tlangveng inkar kawngpui khâr a nih dawn thu a puang. Kawngpui khar chhung hian PWD-in an thawm ṭha dawn a, hnathawh tibuai thei tura kawngpui sîra lirthei leh bungrua dah phal a ni lo.

SRH-ah mi 20 awm
State Referral Hospital-ah nimin khan Covid-19 vei mi panga dah luh niin, mi pathum chhuahtir an ni thung a, mi 20 enkawl mek an ni. SRH-ZMC Bulletin tarlan danin, mi 20 zinga pahnih chu ICU-ah awmin, ventilator hmantir ve ve an ni a; mi dang zawng Isolation ward-ah awmin, harsatna lian tham nei an awm lo. ZMC laboratory-ah nimin khan RT-PCR hmangin swab sample 389 endik a ni.

In kângah kâng hlum
April 15, Ningani zan dar 8 vel khan Tlawng, Reiek kàiah in a kâng a, in neitu Keiaiṭhiauva (54) s/o Thanchuanga a kâng hlum. Thu dawn danin, Keiaiṭhiauva hi amaha khawsa a ni a, in kan chhan hriat chian a ni lo. A ruang chu Maubawka an inpuiah lâk a ni a, nimin khan vui a ni.

Motor insú-ah Mi pakhat a thi
Nimin chhun dar 1 vel khan Khawlailungah tipper leh bike an insû a, bike-a chuang mi pakhat a thi. Thu dawn danin, tipper hi Bhavia company hman lai a ni a, bike-ah mi pahnih an chuang a, an insut hnuah tipper chuan bike chu a chíl zui a ni. Bike-a chuang mi pahnih chu hliamin, Khawlailung damdawi-inah hruai nghal an ni a, bike hnunga chuang Thantluanga, Khawlailung chu damdawi-in lian zawk panpui a nih laiin a hliam tuar loin a thi a ni.