Swab sample endik lo tan Mizorama luh theih a ni lo - Health Minister

Health & Family Wel­fare minister Dr R Lal­thang­liana chuan nimin khan Vairengte screening point a tlawh a; screening point-a swab sample endik lo tan Mizorama luh theih a nih loh thu a sawi.

Dr R Lalthangliana chuan, Vairengte scree­ning point-a thawkte leh Vairengte khawtlang hruaitute a kâwm a, "Vai­rengte hi Covid-19 hri dona kawnga hmatáwng­tu pawimawh tak a nih rual­in, ramri vên kawnga khaw­tlang anga in hma­lak­nate hi entawntlak a ni," a ti a; Covid-19 hri léng thawh hnihna thleng mek dona­ah pawh thâ thlah loa sorkar hmalakna tichaktu ni zel turin a chah.

Health Minister chuan, Vairengte scree­ning point chu ram páwn aṭanga mihring leh bungrua luhkapui ber a nih avangin endikna chu uluk leh ngawrh taka kalpui a ṭul thu a sawi a, "Screening point-a swab test ti lo lirtheite Mizo­ram­ah an lut thei lo ang. Thawktu indaih lohna avanga lirthei tlân tlang palh a awm loh nan a ṭul a nih chuan police duty dah belh a ni ang," a ti.

Vairengteah doctor dah belh a nih dawn thu leh a awm tur pawh tihfel a nih tawh thu sawiin R Lal­thangliana chuan, "Scree­ning point-a thawk tur pawh dah belh tura rua­hmanna siam a ni dawn," a ti bawk.

Minister Dr R Lal­thangliana chuan, Kolasib District Hospital-a dialysis kháwl bun tum meka neih hmasak ngai, RO Plant chu Kolasib bialtu MLA K Lalrinliana hmalaknain tihhlawhtlin a nih tur thu a sawi a; World Bank hnuaia hmalakna tur, Mizoram Health System Strengthening Project dilna a hlawhtlin thu a sawi bawk.

Health Minister hian Vairengte, Bairabi leh Kanhmun screening point-a thawkte leh Vairengte Joint YMA President hnenah pawisa leh an mamawh ang bungruate a hlân nghal. Minister ṭawiawmtu National Health Mission (NHM) mission director Dr Eric Zomawia sawi danin, April 15, Ningani kha Mizorama ni khata Covid vaccine pek tam ber ní a ni a, mi 12,438 hnenah vaccine pek a ni.

Health Minister hi Health secretary R Lal­ramnghaka, Health Services director Dr H Lal­chungnunga leh Covid-19 state nodal officer Dr Pachuau Lalmalsawma te pawhin an ṭawiawm a ni.