COVID-19: Mizoram dinhmun : Hripui vei 25 hmuh belh a ni

April 15, Ningani khan Mizo­ramah Covid-19 vei mi 25 hmuh chhuah belh a ni a, an zingah natna (symptom) lang mi 10 an awm a, Myanmar aṭanga tun hnaia rawn lut pakhat a awm bawk. Nimin khan hripui laka fihlîm tawh mi panga chhuahtir an ni.

Covid-19 vei hmuh thar mi 25-te chu mipa 12 leh hmeichhia 13 an ni a; ZMC laboratory-a hmuh chhuah mi pali leh RAT hmanga hmuh chhuah mi 21 an ni. TrueNAT-PCR hmanga swab sample endik zingah hripui vei an awm lo.

Hripui vei hmuh thar zinga pakhat chu tun hnaia Myanmar aṭanga rawn lut, Zokhawthar aṭanga Aizawla April 14-a thleng a ni. Electric Venga awm anga tarlan ni mah se, an vengah a awm lo a, veng danga awm a nih thu, Electric Veng LTF Secretary chuan a sawi.

Mizoramah Covid-19 vei mi 4,747 hmuh chhuah a ni tawh a, mipa 3,395 leh hmeichhia 1,352 an ni. Nimin tlai dar 5 thleng khan mi 4,482 (94.42%) chhuahtir an ni tawh a, mi 12 (0.25%) thi tawhin, enkawl mek mi 253 (5.33%) an awm.

April 15, Ningani khan ZMC laboratory-ah swab sample 401, TrueNAT-PCR hmangin district paliah sample 49 leh RAT hmangin district 10-ah sample 2,031 endik a ni a; sample endik zawng zawng chu 2,481 (mipa 1,318 leh hmeichhia 931) niin, chu'ng aṭanga hripui vei hmuh 25 chu 1.10% a ni.

Covid-19 positive hmuh chhuah thar mi 25 zinga mi 14 chu Mizoram chhunga kái chhâwng nia hriat niin, mi 11 chu state páwn aṭanga rawn lut hlim leh tun hnaia rawn lutte an ni a; tualchhunga kái mi 14 zingah kàina hriat loh panga an awm. Covid-19 natna lang chhuak mi 10 an awm bawk.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni. ZMC-ah positive 2,690 hmuh chhuah a ni tawh a, TrueNAT-PCR hmangin 685 leh RAT hmangin 1,371 hmuh chhuah a ni tawh.

Hripui laka fihlim tawh mi panga chu nimin khan enkawlna hmun aṭangin chhuahtir an ni a; SRH-ZMC aṭangin mi pathum leh Durtlang BSUP CCC aṭangin mi pahnih an chhuak a ni. IDSP Bulletin tarlan danin, April 11, 2021 thlengin Mizoramah swab sample 2,71,178 endik a ni tawh a, chu'ng aṭanga Covid-19 positive hmuh tawh zat 4,727 chu 1.74% a ni. Hripui vei hmuh tawh zinga mi 2,249 chu Mizoram chhunga kái chhâwng an ni a, mi 2,498 chu Mizoram páwn aṭanga an rawn luh hnua hmuh chhuah an ni thung.

Covid-19 vei hmuh tharte
ZMC-A HMUH CHHUAHTE
Tuikhuahtlang - 1: Mipa kum 3, positive nen inkungkaih vanga sample endik, symptom nei.
Bethlehem Veng - 1: Hmeichhia kum 57, positive nen inkungkaih vanga sample endik, symptom nei lo.
Hotel Regency - 2: Mipa kum 39 & 59, symptom nei lo, an chanchin kimchang hriat loh.

RAT HMANGA HMUHTE
Kanan Veng - 7: Mipa kum 55 leh hmeichhia kum 14, 23, 32, 47, 71 & 91; an vaiin positive hmuh tawhte nena inkungkaihna nei, symptom nei 3 an awm.
Bethlehem Veng - 1: Hmeichhia kum 32, symptom a neih vanga private hospital-a sample endik, hri Damveng - 1: Mipa kum 12, private hospital-a sample endik, kaina hriat loh, symptom nei, kaina hriat loh.
Electric Veng - 1: Mipa kum 16, ram páwn aṭanga rawn lut, private hospital-a sample endik, kaina hriat loh, symptom nei lo. Ani hi tun hnaia Myanmar aṭanga rawn lut, April 14-a Zokhawthar aṭanga Aizawla rawn thleng a ni a, Electric Venga awm ni loin, veng danga awm a ni.
Kulikawn - 1: Hmeichhia kum 64, private hospital-a sample endik, kaina hriat loh, symptom nei lo.
Vaivakawn - 1: Hmeichhia kum 21, symptom neih vanga private hospital-a sample endik, hri kaina hriat loh.
Zuangtui - 2: Mipa kum 28 & 55, Mizoram páwn mi, April 10-a Jharkhand aṭanga thleng; natna an neih vanga private hospital-a inentira sample endik nghal, symptom nei lo ve ve.
Zokhawthar - 1: Hmeichhia kum 26, ram pawn aṭanga zin haw, Aizawla private hospital-a sample endik, kaina hriat loh, symptom nei lo.
Vairengte - 2: Mipa kum 25 leh hmeichhia kum 26; Guwahati aṭanga haw, Vairengte screening point-a sample endik, symptom nei lo ve ve.
Siaha New Colony - 1: Hmeichhia kum 30, Guwahati aṭanga haw, Vairengte screening point-a sample endik, symptom nei lo.
Thenzawl - 3: Mipa kum 42 leh 43(2); police, PTS-a awm, Assam inthlana duty zo rawn haw, a hmain TrueNAT-PCR-a endikah an negative tawh, an zinpui zinga mi positive an awm avanga endik nawnnaa positive ta an ni a, symptom an nei vek.