Mizoramah ráltlân 2,686 an awm CYMA-in ṭanpuina pek tur a tichhuak

Central YMA chuan, report an dawn chinah Myanmar tualchhung buaina avanga sahimna zawnga Mizorama rawn lut tawhte chu mi 2,686 an nih thu a tarlang. CYMA hian Myanmar ráltlânte chhawmdawlna tur an dawn khawmte sem dan tur nimin khan an tichhuak a ni.

CYMA chuan, "Myan­mar-a mipui sorkar February 1, 2021-a sipai­te'n an hnehchhuh vanga ráltlân, February - March 2021 chhunga kan kawl mekte April 9, 2021 hmaa CYMA office-a thehlut tura kan inngenna anga April 14 thlenga CYMA-in raltlan report a dawn chu Aizawl khawpui chhunga YMA branch 46 aṭangin mi 1,047 leh Aizawl khawpui páwn aṭangin mi 1,639, an vaiin mi 2,686 an ni," a ti.

Central YMA chuan Aizawl leh khaw danga Myanmar ráltlân dawngtu YMA-te hnenah ṭanpuina pek zat tur a tichiang a; YMA branch leh sub-headquarters-te chu sum faia pe loin, ei tur leh mamawh danga pe turin a chah a ni. Aizawl khawpuia YMA branch-te chu branch pre­sident/secretary seal kengin April 19, Thawhṭanni aṭangin CYMA pisaah lak theih a nih thu an tarlang bawk.