Sorkarin sumdawngte min en hrang - MIMA : Mask vuah loh vanga Rs.1,000 chawi lo turin MIMA-in dâwr nghaktute an chah
Mizoram Merchant Association (MIMA) chuan, Mizoram sorkarin dawr nghaktu hmai tuamna (mask) vuah lote Rs. 1,000 chawi tura a tih chu pe lo turin sumdawngte an hriattir a; sorkar chu sumdawngte en hrang bikah an puh.
MIMA hian nimin khan thuchhuah siamin, sorkarin inkaihhruaina thar a siamah, mask vuah lote Rs. 100 chawi tura a tih laia dàwr nghaktu mask vuah lote Rs. 1,000 chawi tur a ti bik chu an ngaithiam lo tak zet tih an tarlang a, "Hetianga inenhranna leh inthlei bikna awm hi thleng leh tawh ngai suh se," an ti.
Sorkar thuchhuak chu demin MIMA chuan, "Hetianga thupek chhuah hi sumdawngte zahlohna lian tak leh inthlei bikna lantirna lian tak a ni. Chuvangin, dawr nghaktu, mask vuah lo mante'n Rs. 1,000 pek loh tur a ni," an ti a; sumdawngte chu ram economy bulpui leh ram innghahna ber pakhat an nih thu an tarlang.
MIMA chuan, dawr nghaktu mask vuah lo Rs. 1,000 chawitir tura a tih ni lo, sorkarin inkaihhruaina a siam dangte chu zâwm tur leh mask vuah vek turin sumdawngte an chah a, "Dawr nghakte zingah mask vuah lo mante chuan sorkarin mi dangte a chawitir ang Rs. 100 erawh hi chu chawi hreh loh tur a ni," an ti.
MIMA chuan, dawrah pawisa khawn neuh neuh a tam tih sawiin, "Kutdawh, ṭanpuina dil, charity atana street concert, dawr awmna area-a local mite khawn tesêp a tam hle," an ti a; chu'ngte chu hriatpui turin sorkar leh mipui an ngen bakah, inthliar hranna awmtir tawh lo turin sorkar an ngen a ni.
Sorkarin SOP thar a duang leh dawn a nih a, sumdawngte kaihhnawih thil a tel a nih chuan sumdawngte aiawh teltir ve tawh turin MIMA chuan sorkar an phût bawk. Vanglaini palai zawhna chhángin MIMA general secretary Lalramsanga Sailo chuan, an ngenna chu dawr nghaktute'n an zawm nghal mai tura an ngaih thu a sawi.
MIMA General Secretary chuan, sorkar thil tih dan chu Covid-19 laka invenna tur ngawr ngawr ni loin, sum siam an tumna nia an hriat thu a sawi a, "Rs. 1,000 chawi vanga Covid-19 kái lo turte chu ni ila kan chawi hreh lo vek ang, mahse, Rs. 1,000 chawi hi kài loh phahna tur a ni lo. Enhran bik nih kan duh lo a, dan kan bawhchhia a nih chuan mi dang chàwi zat ang bawk kan cháwi ve mai tur a ni. Keimahni leh mi dang himna tur kan ngai pawimawh ve tho a, kan him tlân nan theihtawp kan chhuah ve tho a ni," a ti.