ZPM party-in Aizawla tui harsatna chingfel thuai turin sorkar an phût

ZPM party chuan, mipui ni tin mamawh zinga pawimawh ber, tuia Aizawl khawpui harsatna chu a rang thei ang bera chingfel turin sorkar an phût.

ZPM chuan thuchhuah siamin, Aizawl khawpuia tui harsatna chuan zual lam a pan zela a lan thu sawiin, "Sorkarin chhuanlam hrang hrang siamin tuia kan harsat chhan an sawifiah tawh ṭhin. Mipuiin sorkar thuchhuak chu phunnawi lo leh dawhthei takin kan nghak zel a ni," an ti a; mahse, tuia harsatna chuan ziaawm lam aiin zual lam a pan zel thu an sawi.

April 13, 2021-ah PHE department-in thuchhuah siamin, thu leh awm hma chuan Aizawl khawpuiah tui connection thar pek chhuah theih a nih loh thu an puang tih tarlangin ZPM chuan, "Sorkarin chhuanlam a lo siam tawhte dawhthei tak leh phunnawi miah loa nghaktu, tui mamawha rûm mek mipui a timangangin a tibeidawng tak zet a ni," an ti.

ZPM party chuan, "Sorkar laipuiin thingtlang mite thlenga tui hnianghnâr kan neih theihna atan Jal Jeevan Mission scheme hial a siam a, mahni in chhung khura tui herh haw vek theih tura ruahmanna siama hma a lak mup mup laia state khawpui bera khawsate'n tui harsatna kan tâwk ta mai hi a zia lo tak zet a ni," an ti a; tui harsatna chungchangah chhuanlam siam kual reng lo a, a rang thei ang bera chingfel turin sorkar an phût a ni.