Covid vaccine lakna siam turin ngen

ZPM Ṭhalai president leh AMC Ward-XVIII bialtu councillor Malsawmzuala Ralte chuan, Ward-XVIII huam chhungah Covid-19 vaccine man chawia lak theihna ruahman turin Aizawl West Chief Medical Officer (CMO) a ngen.

Malsawmzuala Ralte hian nimin khan Aizawl West CMO chu a pisaah a kâwm a, AMC Ward-XVIII huam chhunga private hospital khawi emaw berah man cháwia mipuiin Covid-19 vaccine an lak ve theihna tur ngaihtuahpui turin a ngen a ni. CMO chuan, councillor thu thlen chu pawimawh an tih thu leh vaccine lakna chu a tam thei ang awm se ṭha an tih thu an lo hrilh.

AMC Ward-XVIII Councillor chuan Aizawl Hospital & Research Centre Director pawh lènchilhin, an damdawi-ina Covid vaccine lak theih dan tur a sawipui a; Director chuan, anni lam chuan an tih tur ang ang an tifel tawh a, portal/technical/central lamah harsatna a awm rih thu an sawi.

Malsawmzuala Ralte hian a bial chhung Salem Veng Sero Point leh City Hospital, Mission Veng bul hnaia ATM booth dah a nih theihna turin RBI, SVI leh HDFC hotute tun hnai khan a dawr kual bawk.