KHAWTHLIR

Chanchintha Thlen Ni
Vawiin, March 15 hi Mizorama Chanchinṭha Thlen Ni a ni a, Presbyterian Kohhrante'n an hmang dawn a, tualchhung kohhran tam ber chuan zanah inkhawm an nei ang. Mizorama Pathian thu hril hmasa bera ngaih Rev. William Williams-a'n Tlawng lui kam, Kutbûl lui chhuah a thlena Pathian thu a hril ṭan ni, March 15, 1891 champhaah Chanchinṭha Thlen Ni hi hman ṭhin a ni a; kuminah hian Rev. William Williams-a chanchin an zirho dawn. Presbyterian Kohhran hian kum 2014 aṭang khan March 15-ah Chanchinṭha Thlen Ni an hmang ṭan a ni.

Hmalakna sawiho
April 11, 2019-a Lok Sabha inthlanpui awm tura returning officer Vanlalngaihsaka, Aizawl DC chuan nimin khan Aizawl district chhunga nodal officer leh assistant nodal officer-te DC conference hall-ah a kâwm a, inthlan awm tura hmalakna tur hrang hrangte a sawipui.

Workshop buatsaih
Health & Family Welfare department leh Persons with Disabilities (PwD) office chuan nimin khan Aizawl Civil Hospital conference hall-ah ni hnih awh tur Disability Assesment & Certification chungchang zirhona an buatsaih ṭan a, vawiinah chhunzawma zawh a ni ang. Workshop-ah hian Safdarjung Hospital leh Vardhman Mahavir Medical College aṭangin Prof. Dr Wadhwa leh Prof. Dr Ajay Kumar ten an telpui a; district hrang hranga pediatrician, orthopedic surgeon, opthalmologist, medicine, psychiatrist, ENT specialist-te koh khawm niin, thupui pasarih zirho a ni.

Bill pass
Nimin Assembly budget sessoin-ah Health & Family Welfare minister Dr R Lalthangliana put luh, 'The Mizoram Anatomy Bill, 2019' chu sawiho a nih hnuah pass a ni.

Hma la mek
Nimina Assembly session-ah Zoram Peoples Movement (ZPM) member VL Zaithanzama zawhna chhangin GAD changtu chief minister Zoramthanga chuan, district headquarters atana puan tawh Hnahthial, Khawzawl leh Saitual-te a taka tihhlawhtlin thuai a nih theihna atan sorkarin hma a lak mek thu a tarlang.