Zirtirtu laknaah politics a inrawlh tur a ni lo - Education Minister

School Education minister Lalchhandam Ralte chuan nimina Assembly session-ah ZPM member Vanlalhlana zawhna leh zawh belhna dangte chhangin, zirtirtu laka politics a inrawlh tur a nih loh thu a sawi.

Lalchhandama Ralte chuan, tun hnaia MPSC-in zirtirtu a lakah pawh sawipui tura ngennate a dawng niin a sawi a, "Fair takin a thiam thiam lak tur a ni tih hi ka ngaihdan a ni a, politics a inrawlh tur a ni lo. Education Minister hian eng ang hmang pawih sawipui ka nei lo. Fair taka hna lak ka duh a ni. MR leh contract-a zirtirtu kan lak tur pawh a theih chin chinah fair takin lak tur a ni," a ti.

Education Minister sawi danin, muster roll-a zirtirtu lak tum a nih chhan chu, zirtirtu mamawhna lian tawh a, hmanhmawh taka lak a ngaih vang a ni. A ngheta lak tur chuan thil tih tur ṭul a tam a, hun a duh rei a ni. Tun dinhmunah zirtirtu post ruak hnawhkhah loh 2,000 chuang a awm.

INC member KT Rokhaw zawhna chhangin Lalchhandama Ralte chuan, CSS hnuaia Hindi teacher bân takte rawih chhunzawm an nih theihna turin sorkarin hma a lak thu a sawi.

School Education Minister chuan, an sorkar tirh aṭangin Hindi teacher bân takte rawih an nih leh theihna atan theihtawpin hma an la nghal niin a sawi a, "Chief Minister Delhi-a a kal ṭumin Union Home Minister a sawipui nghal. Home Minister a sawipui chhan chu, a rawn zin ṭum khan sorkarin a lo thlen a, bawhzui a intiam vang a ni. Higher & Technical Education Minister pawhin HRD Minister a sawipui tawh," a ti.

Lalchhandama Ralte chuan, amah ngei pawhin Hindi zirtirtute chungchangah HRD Minister biak a tum tawh tih sawiin, "Kan inhmuh hun turah tak Pulwama thil thleng vangin Union Cabinet emergency-a koh a ni a, ka hmu thei ta lo," a ti a; MHRD hnenah hian DO letter thawnin, Hindi zirtirtute dah leh tura a ngen thu a sawi.

CSS hnuaia Hindi zirtirtu 1,305 bân an nih aṭangin kum khat a tling tawh tih sawiin Education Minister chuan, "Nunna chán leh hna dang lo thawkte an awm tawh. April 1 aṭangin RTE Act angin zirtirtute chu training chauh lak theih a ni dawn a, Hindi zirtirtu lak phalna kan hmu a nih pawhin danin a phut anga tlingte la turin hma kan la ang," a ti.

ZPM member C Lalsawivunga zawhna chhangin Lalchhandama Ralte chuan, "SSA hnuaia zirtirtute hlawh hi ni li kan sorkar chauh tihin sorkar hmasain an pek loh thla li hlawh kan pe nghal a, bá kan nei lo," a ti a; SSA zirtirtute March thla hlawh tur pawh an neih tawh thu a sawi.