Mizoram MLA-te hamṭhatna chi 11 pe mek

Mizoram state Legislative Assembly pasarihna (term liam ta), kum 2013-2018 chhung khan sorkar chuan MLA-te hamṭhatna chi hrang hrang 11 a pe. MLA-te hamṭhatna an dawn zinga pakhat, lirthei leina chu tuna Assembly term thar (pariatna)-ah tihpun a ni a, cheng nuai 400 sen a ni dawn. MLA-te zinna senso atan term liam taah khan MLA 25 zinna senso bik atan cheng nuai 145 chuang hman a ni.

Vanglaini-in RTI Act hmanga Assembly Secretariat-a MLA-te hamṭhatna dawn chi hrang hrang a zawhna chhannaa a lan danin, kum 2013-2018 chhung khan MLA 25-te sum sênna tam ber pakhat chu zinna senso a ni a, chuta tan chuan Rs. 1,45,37,221 hman a ni. Sorkar hmasa huna Chief Minister leh minister-te zinna erawh a tel lo. MLA 25-te zin bill-ah hian a hmaa parliamentary secretary lo ni tawhte chu MLA an nih aṭang chauha chhiar tel a ni bawk.

Tarlan tawh angin, MLA-te lirthei leina atana sorkarin sum a pek ṭhin chu sorkar term hmasaah Rs. 8,00,000 a ni a, tuna sorkar term tharah hian Rs. 10,00,000-ah tihpun a ni. MLA-te chuan motor leina tur sum chu pawisa faiin an la thei lo a, an la duh lo thei bawk a; an la dawn a nih chuan motor a lei ngei a ngai. Motor lei loa driver chauh pek pawh a rem lo nia thu dawn a ni.

MLA-te hamṭhatna dawn dan
1. Salary & Daily Allowance: Member-te an term chhungin thla tin Rs. 40,000 pek an ni a, Assembly Secretariat/Committee meeting a awmin daily allowance state chhungah Rs. 750 leh state páwnah Rs. 1,000 pek an ni.
2. Residence: MLA-te an term chhungin an in siamṭhatna leh chei nan an tlin veleh Rs. 1,00,000 an hmang thei a, a hnuah kum tin Rs. 50,000 an hmang thei.
3. Constituency, Contingency & Family: Thla khatah Constituency Allowance Rs. 10,000, Contingency Allowance Rs. 5,000, Family Allowance Rs. 5,000 leh Resi­dency Allowance Rs. 5,000 pek an ni.
4. Entitlement of Personal Assistant: Personal Assistant (co-terminus) pakhat an ruai thei a, hlawh/lawmman atan thla khatah Rs. 20,000 aia tam lo sorkarin peksak ṭhin.
5. Travelling Facilities: MLA leh a chhungte zin nan sorkar kum khat chhungin Rs. 2,00,000 aia tam lo an hnmang (re-imburse) thei .
6. Vehicle: Motor leina an dawn hnuah thla thum chhungin motor an lei tur a ni a, MLA an nih chhung zawng (co-terminus) driver pek an ni.
7. Personal Attendant: An term chhungin Grade-IV pahnih an chhawr thei.
8. Grants of Loans: In lei nan emaw, thawm ṭhat nan emaw loan Rs. 10,00,000 aia tam lo an pûk thei a, motor lei nan Rs. 4,00,000 aia tam lo an pûk thei bawk.
9. Tui bill, electric bill leh telephone bill-te sorkartin a pêksak ṭhin.