MJA Vice President vui liam

Mizoram Jour­nalists' Association (MJA) General Head­quarters vice president R Lal­hmangaihzuala, Romei chanchinbu editor chu nimin zing dar 2:40 khan heart attack vangin a thi a, nimin vek khan vui niin, Bawngkawn thlanmualah phûm a ni.

R Lalhmangaihzuala hian kumin kum tìr aṭang khan blood pressure sang a nei a, mahse, harsatna lian tham a neih phah lem lo. Ningani zanah pawh Vanapa Hall-ah Chapchar Kût Miss result puannaah telin, lawmmante pawh a hlan.

Vanapa Hall aṭanga a haw hnu, zan dar 10:30 velah nuam lo riauin a inhria a, dar 11 velah Greenwood Hospital-ah a inentir a; doctor-te'n an lo ennaah, a BP chu a ṭhaah an ngai a, nachhawknaa an chiu hnuah an haw leh nghal a ni. Zan lai pelh hnu, zing dar 2 velah a thâw a danglam a, a nupuiin a hriat chuan nikhua a lo hre tawh lo a; Greenwood Hospital-ah kalpui nghal mah se, an chhan hman lo a, zing dar 2:40-ah a thi ta a ni.

Nimina vuina in­khawmah MJA aiawhin president Zonunsanga'n thu a sawi a; R Lalhma­ngaihzuala chu MJA thluak bûr a nih thu sawiin, "MJA banpui tak tak a ni a, khawi ilo kalnaa zin nikhuaahte hruaitu nih a tling hle a ni," a ti. Vuina hun hman a nih lai hian district hrang hranga MJA-te'n sunna hun an lo hmang vek a ni.

R Lalhmangaihzuala s/o VL Ruata hi October 6, 1965-ah Hortoki-ah a piang a, kum 1979-ah Aizawlah pêmin, Bawngkawnah an in­béngbel a, kum 1985-ah Lalfamkimi nen an innei. January 1992 aṭangin Romei chanchinbu a enkawl ṭan a, a thih thleng hian editor a ni a; kum 2010 aṭangin Hnehtu chanchinbu a enkawl tel bawk.

Kum 1993-ah MJA member a ni ṭan a, kum 2004 aṭangin MJA executive committee-ah awm ṭanin, a thih thlengin chatlak loin a awm. Kum 2006-2010 chhung MJA secretary, kum 2010-2012 chhung general secretary, kum 2014-2018 chhung treasurer a ni a; a thih lai hian vice president a ni. Kohhran lamah, UPC (NEI) kohhran upa a ni a, rawngbawlna chanvo pawimawh tak tak eng emaw zat chelh tawh a ni.