Written exam neih tawh cancel chhan SWD Minister-in House-ah a sawifiah

Social Welfare department (SWD) minister Dr K Beichhua chuan nimina Assembly session-ah MNF member Lalrinsanga Ralte zawhna chhangin, Poshan Abhiyan project hnuaia post ruak 22 lakna tura exam neih tawh cancel a nih chhan a sawifiah.

Dr K Beichhua chuan, post ruak 22 hnawhkhahna tura advertisementt chhuahah, 'Man­datory for local candidate' tih a nih thu sawiin, "February 9-a result tihchhuahah common merit list tihchhuah a ni a, hei hi ka hriat loha tih a ni. Advertisement-ah 'Mandatory for local candidate' tih a nih avangin department lamin ka hriat loh thoin, common merit list bakah hian local candidate an thlang leh a, mi 54 an ni ta a ni," a ti.

SWD Minister chuan, a hriat loa thil tih a awm tih a hriat veleh department hotute a ko tih sawiin, "Ka hriat loha an thil ti chu a dik loh bakah, dik loa thil an ti chu ṭha lo ka tih thu ka hrilh a ni," a ti a; a hriatpuia thil tih ni lo mah se, a changtu minister a nih avangin thil thleng chu a mawhphurhnaa pawmin, mi 54-te interview tura kohna chu a cancel tih a sawi.

Interview hi kaltlangpui a nih chuan sawiselna a awm dawn tih sawiin Dr K Beichhua chuan, "Chuvangin, written exam tih tawh pawh ka cancel tur a ni. Hetianga thil a kal hi pawi ka ti tak zet a, written exam hmachhawn zawng zawngte hnenah thuphá ka chawi a ni. Tih dik loh kan nei a nih chuan kan pawm mai turah ka ngai. Department-a thawk fel tak tak an awm laiin, inthlahdah deuh an la awm," a ti.

ZPM member C Lalsawivunga zawhna chhangin SWD Minister chuan, kum 2017-19 chhungin pianphunga rualbanlo mi 1,160-te hnenah ṭanpuina pek a nih thu a sawi a, "Rualbanlo, a bika ṭanpui ngaite survey neih mek a ni a, survey data aṭang hian anmahni ṭanpuina tur ruahmanna siam a ni ang," a ti a; tun dinhmunah naupang kum 18 hnuai lam enkawlna home pahnih a awm thu a sawi.