KHAWTHLIR

Thisen pe
Serchhip College NSS unit chuan nimin khan an college-ah blood donation camp an huaihawt a, Serchhip District Hospital tan thisen unit 50 an pe a, a petute hmeichhia 28 leh mipa 22 an ni.

Mal din dawn
PRISM party chuan April 11, 2019-a Lok Sabha inthlanpuiah PRISM chuan an party-in official candidate an neih tur thu, thuchhuah siamin an puang a; an candidate tur chu March 18, Thawhṭanni chhunah R Zamawia in, Tuivamitah an puang dawn tih an tarlang.

ZORO lawm
Zo Reunification Organisation (ZoRO) chuan thuchhuah siamin, Mizoram Legislative Assembly-in nimina an session-ah, 'UNDRIP 2007 hi a hlawhtlin nan India sorkarah na takin nawr ni rawh se' tih resolution an pass chu lawmawm an tih thu an tarlang a; "Resolution pu luttu Pu Vanlalhlana leh Assembly member zawng zawng chungah thinlung takin lawmthu kan sawi a ni," an ti.

Tehkhin Thu 72
Lalnunpuia Hrahsel lehkhabu ziah, 'Tehkhin Thu 72' tih chu nimin khan ICT department conference hall-ah Rev. VL Luaia Hranleh-in a tlangzarh. Lehkhabu hi phek 208-a chhah a ni a, Rs. 200 man a ni.

Saza humhalh
Aizawl Forests Division leh Association for Environmental Preservation (ASEP)-te chuan nimin khan Durtlang khâma saza (serow) awm mek humhalhna a nih thu puanzarna thuziak (hoarding) pahnih an târ. Aizawl dáiah saza hmuh tur a awm chu lawmawm an tih thu sawiin, a humhalhtu ni ṭheuh turin mipui an ngen a ni.

Um zui zel tum
PWD changtu chief minister Zoramthanga chuan MNF member Ramthanmawia zawhna kal zelah, PWD-in a enkawl ni lo kawngte pawh a theih ang anga ûm zui zel sorkarin a tum thu House a hrilh a, "PWD-in a enkawl ni lo kawngte hi hlamchhiah thiang a ni lo. A neitu kan nih miau avangin kawngte hi kan enkawl a ni emaw, ni lo emaw, kan ûm zui zel ang. Heng kawngte PWD-in a enkawl lohte hi kan lak let lehte pawh a ṭul mai thei," a ti.