NLUP hnuaia pung awm loa loan Latute dinhmun zir chian a ni dawn

Agriculture minister C Lalrinsanga chuan, Congress sorkar laia flagship programme - NLUP hnuaia a pung awm loa loan late dinhmun chu zir chian a ni ang a, chumi hnuah hmalak dan tur tihchian a nih tur thu a sawi.

ZPM member Lalchhuanthanga zawhna chhangin Agriculture Minister chuan, NLUP hnuaia loan late zingah LZ Bamboo Industry, Mizoram Broom India leh CDAR-te'n cheng khatmah an la rulh loh thu a sawi a, "Hnam Chhantu-in cheng nuai 35 leh Samuel Tea Factory-in cheng nuai 3.40 an rûl tawh," a ti.

C Lalrinsanga chuan, NLUP hnuaia loan pek dan uluk tak enfiah a nih hnuah, a ṭul angin sorkarin a la ngaihtuah tur thu sawiin, "Interest free loan latute dinhmun hi zir chian a ni dawn a, chumi hnuah hmalak dan tur tihchian theih a hmalak dan tur tihchian theih a ni ang," a ti a; loan latute'n dahkham dahin, kum 2017-a rûl tura tih an nih thu a sawi.

ZMP member Dr Vanlalthlana chuan NLUP Cell-a thawk mi 68-te awm zel dan tur a zâwt a, "Mi 10 chu MIP hun laia lâk, chhawr chhunzawm zel an ni a, hengte hian duhsak bik an hlawh dawn em?" a ti.

Agriculture Minister chuan, NIB thawk mekte chungchang chu ngaihtuah zel a nih thu sawiin, "NIB Exit Protocol buaipui zel a ni a, a ṭhen tihfel tawh niin, tihfel loh ṭhenkhat a la awm," a ti a; NIB Exit Protocol chu tihzawh a nih hnuah thawktute dinhmun ngaihtuah a nih tur thu a sawi.

MNF member L Thangmawia'n NLUP dawng tura thlan, an bank account-a pawisa dahsak tawh mi 2,000 chuangte pawisa pek zui theih an nih leh nih loh a zawhna chhangin Agriculture Minister chuan, "Chhui zui ngai a awm tih kan hria a, a ṭul angin enfiah a ni ang," a ti.