Mizorama buh thar theihna Ram zau zawng hriat a ni lo

Agriculture minister C Lalrinsanga chuan ZPM member VL Zaithanzama zawhna chhangin, Mizorama buh thar theihna zau zawng hriat theih a nih loh thu House a hrilh.

Agriculture Minister tarlan danin, Agriculture department-in Mizoram pum land survey data a neih loh avangin Mizoram puma buh thar theihna zau zawng hriat chian theih a ni lo. Mizoram Remote Sensing Application Centre (MIRSAC)-in a hmuh chhuah danin, Mizoramah ram leileta siam theih hectare 74,644 a awm a, chu'ng zinga hectare 17,000 chu leileta siam a ni tawh.

Leilet bakah hian, kum tinin tlang ram lo neih a ni a, tlang ram lo atana buh thar theihna zau zawng chhût chhuah a la ni lo.

Tun hnai kum thum chhunga Mizorama buh thar dan chu - kum 2015-16 chhungin metric ton 62,089, kum 2016-17 chhungin metric ton 61,516 leh kum 2017-18 chhungin metric ton 59,605.6 a ni.