Hmarchhak huap workshop buatsaih

Ministry of Statistics & Programme Implementation (MoSPI) leh Department of Economics & Statistcis ṭangkawp chuan nimin khan Hotel Regency, Aizawlah ‘Regional conference-cum-workshop on State Index of Industrial Production (IIP) for North East Region’ an buatsaih a, Nagaland tih loh hmarchhak state dang aṭangin palai an tel kim.

Workshop hawnna inkhawm chu New Delhi-a Economic Statistic Division director Rajesh Kumar-a'n a kaihruai a; Mizoram aṭanga tel Planning secretary Dr C Vanlalramsanga chuan, hmarchhak huap IIP Conference chu Mizoramah thlen phalsak an nih vang­in Ministry of Statistics & Programme Implementation chungah lawmthu a sawi.

Dr. C Vanlalramsanga chuan, Mizoramah State Index of Industrial Production (IIP) ground survey chu Economics & Statistics department kutah dah a ni a, chak takin hma an lakna zarah March 6, 2019 khan zawh thawkhat a nih thu a sawi a, "Hetiang survey pawimawh hrang hrang hian ram hmasawnna atana ruahmanna siamnaah nasa takin sorkar a pui a ni," a ti.

Planning Secretary chuan, Mizoramah sum dehchhuak thei tur industry hrang hrang awm theite (industrial potential) leh sumdawnna lama investor-te hîp turin business summit ‘Magnetic Mizoram’ neih a nih thu sawiin, "Magnetic Mizorama ram pawn embassy aiawh lo kalte pawhin Mizoramin IIP leh survey report dangte a la nei loh avangin an tum angin hmalak harsa an ti," a ti ;, tunah chuan sorkar laipui ṭanpuina nen Mizoramin IIP leh survey statistics kimchang zawk a nei theih dawn thu a sawi.

MoSPI additional director general GS Lakshmi pawhin thu sawiin, "India hmar­chhak bial hi investment atan duhthusam a ni a, industrial survey leh survey pawimawh dangte hmang­a zir chian a, statistics leh data kimchang zawk neih hunah chuan nasa zawkin he lai hmunah hmasawnna tur kawng a rawn inhawng dawn a ni," a ti.