Serchhip bial inthlan: By-election-ah vote 83.85% a tla

Serchhip Assembly constituency by-election chu April 17, Inrinni khan tluang taka neih a ni. Inthlanah hian vote 83.85% a tla a, vote tlate chu May 2, 2021-ah chhiar a ni ang.

Inthlanah hian zing dar 7-ah vote thlak hun hawn ṭan a ni a, polling station ṭhenkhatah chuan electronic voting machine (EVM) chiang lo vanga a hun taka vote thlak ṭan theih lohna leh zing dar 8 vela vote thlak ṭanna a awm. Vote thlak ṭan a nih hnuah erawh chuan harsatna lian thleng a awm hriat a ni lo.

By-election-ah hian voter 19,520 awmin, chu'ng zinga mi 16,367-in vote an thlak a, chu chu 83.85% a tling. Kum 2018-a MLA inthlanpuiah khan Serchhip bialah hian vote nei 18,012 awmin vote 15,060 (83.61%) a tla.

Tun ṭuma by-election-ah hian kum 2018 inthlan aiin voter 1,508-in an tam zawk a, vote thlaktu zat, vote tla percentage pawh kuminah a sang zawk. Vote awm zat leh tla zat hi postal ballot leh service voter tel loa chhiar a ni a, tun ṭumah hian service voter 197 an awm.

Tun ṭum inthlanah hian ṭum danga tih ngai loh, pianphung rualbanlo leh kum 80 chin chung lam tan postal ballot hmanga vote thlâk phal a ni a, inthlan hun hmain vote thlaktir an ni. Postal ballot hmanga vote thlak thei zawng zawng chu mi 176 an ni a, mi 167-in vote an thlak.

Serchhip biala by-election atan hian polling station 29 siam a ni a, vote tlak ṭhatna ber Buangpui polling station-ah vote nei mi 316 zinga 295 (93.4%)-in vote an thlak. Vote tlak chhiatna ber Serchhip-XI leh Serchhip-XII polling station-ah vote 78.2% ve ve a tla a, polling station dang zawkah 80% chung lam a tla a ni.

Inthlan níah thil thleng duhawm lo hriat tur a awm lo a, polling station bul hnai tih lohah chuan mipui pungkhawm hmuh tur pawh a awm meuh lo. Ṭum dang angin polling station bul hnaia party flag leh banner hmuh tur a tam lo.

Vote thlak turte chu infrared thermometer hmangin body temperature (khawsik an neih leh neih loh) en hmasak vek a ni a, kutkawr (surgical glove) pek zel an ni bawk. Election Commission of India remtihnain zan dar 7 thleng vote thlak hun hawn a ni a, vote thlak zawh hnuah EVM-te chu strong room-ah dah niin, strong room chu zanlai pelh hnu, nimin zing dar 1:30 velah kalh a ni.