KHAWTHLIR

Thisen pe
April 17, Inrinni khan Civil Hospital, Aizawl tan KṬP, Ramhlun Vengthlang Branch-in thisen unit 40 pein, petute mipa 30 leh hmeichhia 10 an ni a; ṬKP, Vaivakawn unit member mipa pakua leh hmeichhia palite'n unit 13 an pek bakah, mimala pe mi pasarih an awm. KṬP, Chhinga Veng East Branch-in Synod Hospital tan unit 26 pein, petute mipa 17 leh hmeichhia pakua an ni a; KṬP, Kolasib Ṭumpui Branch-in District Hospital tan unit 24 an pe a, petute mipa 18 leh hmeichhia paruk an ni.

Quarantine facility
Mizoram sorkar chuan state páwn aṭanga rawn lutte khung hranna tur, quarantine facility 30 a siam thar leh a; state páwn aṭanga rawn hawte chu bawrhsapte ruahmanna angin quarantine facility-ah inkhung hran tur a nih thu a tarlang. Aizawla quarantine facility 30-te chu zirna-in vek a ni a, chu'ng bakah chuan kohhran hmunhma paruk hman a ni bawk.

Sangha mantu man
Lungtian Group YLA, Lungtian Joint YLA leh Lungtian Branch YLA hruaitute chuan April 16, Zirtawpni zan khan Fungkah luia sangha, dynamo leh chinai hmanga mantute nangchingin an man a, Rs. 10,000 an chawitir bakah, dynamo leh an hmanraw dangte an hâl. Sangha mantute chu Siaha PWD Division hnuaia SA leh labour 19 an ni a, ti tawh lo turin YLA hruaitute chuan an zilh a ni.

Pangpar dah
April 17, Inrinni khan PC party general headquarters hruaitute chuan PC party kum 46-na leh a dintu Brig. T Sailo (L) kum 100-na kal mek pualin Brig. T Sailo thlanah pangpar an dah.

ICU-ah mi 2 awm
Nimin tlai dar 5 dinhmun angin, State Referral Hospital-ah Covid-19 vei mi 28 enkawl mek an ni a, an zinga pahnih chu ICU-ah awmin, ventilator hmantir ve ve an ni. Mi dang 26 chu Isolation ward-ah an awm a, harsatna lian tham nei an awm lo. ZMC laboratory chu nimin khan khâr a ni a, swab sample endik a ni lo.