ASF vangin vawk 855 a thi tawh

Animal Husbandry & Veterinary (AH&Vety) department tarlan danin, April 17, Inrinni leh nimin khan African Swine Fever (ASF) lènna, infected area-a puan tawhah vawk 49 a thi leh a, heti hian Mizoramah ASF vangin vawk 855 a thi tawh. Inrinni khan Siahaah vawk pali kah hlum a ni bawk.

April 17, Inrinni khan Lungsenah vawk 23, Lung­lei Electric Vengah vawk pakhat leh Armed Vengah vawk pahnih a thi leh a, a vaiin vawk 26 a thi. Vawk 26 zinga 12 chu thla thum hnuai lam a ni a, thla 3-8 inkar pakua niin, panga chu thla riat aia upa a ni.

Nimin khan Lungsenah vawk 22 leh Mamit district-ah vawk pakhat, a vaiin vawk 23 a thi. Vawk 23 zinga pasarih chu thla thum aia naupang a ni a, thla 3-8 inkar 10 awmin, paruk chu thla 8 aia upa a ni thung.

Thu dawn danin, Lungsen khua­ah hian vawk 1,162 an vulh a, chu'ng zinga 560 chu March 21, 2021 hnuah thi tawhin, vawk 602 a la dam a ni.

Hetih lai hian, Siahaa district veterinary officer (DVO) Dr Shahlu Khaila hoin Inrinni khan ASF vei vawk puitling pali chu kah hlum a ni a, Vety farm chhungah ft. 10-a thûkah chinai nen phûm a ni.

Vawk palite chu March 26, 2021-a T Lallawmtluanga, Siaha Vaihpi-I hnen aṭanga man an ni a, an thisen lak niin, Siaha District Veterinary Hospital-ah CSF, PRRS leh ASF vei a nih leh nih loh endik a ni. Chumi hnuah finfiah turin ICAR-NIHSAD, Bhopal-ah thawn a ni a, ASF vei a ni tih finfiah a ni.