By-election a thianghlimah an ngai

April 17, Inrinnia Serchhip Assembly constituency by-election vote thlak zawh taka buaipuitu sorkar thuneitute leh tlawmngai pawlte chuan inthlan a thianghlimah an ngai.

District election officer (DEO) Kumar Abhisek chuan Vanglaini palai zawhna chhángin, inthlanna thianghlim leh felfai tak neih a nih thu a sawi a, "MPF nen ṭha taka thawkhoin inthlanna thianghlim leh felfai tak a awm theih nan theihtawp kan chhuah a, MPF hian min pui nasa hle," a ti.

DEO sawi danin, inthlan vuakvetah Election Model Code of Conduct bawh­chhiatna lian tham inhêkna (complaint) a lut lo. Complaint lut tam ber chu flag leh banner târ chungchang a ni. Complaint a luh avangin poster pakhat, banner 51 leh thil dang 64 târ pawh thlak a ni.

Serchhip SP Stephen Lalrinawma chuan, inthlanna thianghlim leh felfai a awm theih nan theihtawp an chhuah tih sawiin, "Tun ṭum inthlanah hian central armed police force leh state aṭangin police 62 pek belh kan ni a, chungte nen chuan inthlan buaipui turin force mi 260 kan awm. Zuin buaina a thlen theih avangin uluk takin kan vâi a, chhun leh zanah nasa takin patrolling kan ti a ni," a ti.

Vanglaini palai zawhna chhangin MPF, Serchhip District Forum hruaitute chuan, political party-te nena an thawhhona thuthlung bawhchhiatna lian tham a awm loh thu an sawi a, "Political party-te an fel khawp mai. Chutihrualin, kan hriat loh leh hmuh phak loha thil thleng a awm a nih chuan kan hre bik lo," an ti a; miin an tum tlat chuan indan theih loh chin a awm thu an sawi.

Serchhipa MPF hruaitute chuan, inthlan atan local forum-te tuaihnûmin, hruaitu tharte an inruat thu an sawi a, "Thawhhona thuthlung bawhchhiat a nih loh nan khawpui chhungah YMA information mike hmangin kan au vek a, voice clip siamin kan thawn darh bawk. Hei bakah hian thuneitute phalna dilin, zan lamah duty-te kan insiam a ni," an ti.

Serchhip MPF hruaitute sawi danin, inthlan níah thawhhona thuthlung bawhchhiatna lian tham a awm lo. Thenzawl polling station pakhat bulah mi pakhatin candidate pakhat vote tura ngenna chuang pen a sem erawh a awm a, a semtu chu ti tawh lo tura an hrilh bakah, Flying Squad hnenah an thlen nghal a ni.