Myanmar aṭanga dan loa lak luh Kuhva rah, beer leh meizial an man

Assam Rifles-te chuan an thawhpuite nen April 15-17, 2021 chhung khan dan loa thil tih kaihhnawihah Dagon beer, ram dang meizial leh kuhva rahte an man.

Assam Rifles-te hian April 15 khan Custom Preventive Force, Champhai nen ṭanghoin Kelkang khuaah kuhva rah ip 730 leh mawhphurtua puh mi pakhat an man a, kuhva rah chu Rs. 1,37,09,400 hù a ni. April 12 khan Ruantlangah kuhva rah ip 50, Rs. 12,52,000 hù leh a neitua puh mi pakhat an lo man tawh bawk.

AR leh Customs department chuan April 17, Inrinni khan Ṭiau lui kamah Dagon beer (Myanmar beer) báwm 20 leh a neitua puh mi pakhat an man a, beer chu Rs. 96,600 man a ni.

April 17 vêk khan Assam Rifles leh Customs ṭangho chuan Champhai Chhungte khuaah ram dang meizial (cigarette) báwm 117 leh a neitua puh mi pakhat an man bawk a; meizial chu Rs. 1,39,10,000 mana chhût a ni.