Candidate-te'n tlin an inbeisei

Serchhip biala Assembly by-election vote thlak zawh tâkah candidate pathum - INC candidate PC Laltlansanga, MNF candidate Vanlalzawma leh ZPM candidate Lalduhoma te chuan tlin ngei an inbeisei thu Vanglaini palai an hrilh.

INC candidate PC Laltlansanga chuan, ṭhahnemngai taka an beihna leh thawhna chu Pathianin mal a sawm ngei a rin thu a sawi a, "Beiseina sang tak kan nei. Kan tlin leh tlin loh erawh Pathian thu thu a ni a, keini chuan theihtawp kan chhuah," a ti.

A tling emaw, tling lo emaw, Serchhip bial chu phatsan a tum loh thu sawiin PC Laltlansanga chuan, "Inthlan awm leh tura ka din nawn leh nawn loh chu kan party hruaitute thu thu a ni," a ti a; Serchhip bial aia bial duh zawk a neih loh thu a sawi.

MNF candidate Vanlalzawma chuan tlin ngei a inbeisei thu sawiin, "Hmun hrang hrang kan fang kual a, mipui che vel leh kan party mi leh sate phûr dan aṭangin tlin ve mai chu kan inbeisei. Mahse, Pathian thu thu ni se," a ti.

Ruling party an nihna chu a tlin chhan tura a rin ber a nih thu sawiin Vanlalzawma chuan, "Kan party hruaitute an ṭang em em a, an phûr hle. Aizawl aṭang pawhin min pui nasa," a ti a, theihtawp an chhuah thu a sawi.

ZPM candidate Lalduhoma chuan, thlan tlin nawn a inbeisei thu sawiin, "Kan inbeisei dan tak chuan a hma aia tlin nasat a ni. Mipui hian kan chunga rorelna lo thleng sût leh an duh. Law court-ah kal loin mipui court-ah kan kal a, mipui an phûr a ni," a ti.

Ruling chakna (weight) a huphurh loh thu sawiin Lalduhoma chuan, "Minister-te an chám a, thil pawh an ti. Mahse, kan chhiatna tham an ti thei tawh lo," a ti a, mipuite'n an duh thlan tur an haia a hriat loh thu a sawi.