Catch The Rain rally neih a ni

Champhai District Rural Development Agency (DRDA) chuan April 17, Inrinni khan tuihna humhalh leh mipui tui tlante a thianghlim zawkna turin Jal Shakti Abhiyan 'Catch The Rain' hnuaiah rally thawh khatna, Tuipui lui hnárah an buatsaih a, bawrhsap Maria CT Zuali'n a hmanpui.

Maria CT Zuali chuan, Mizoramin ruahtui tla a dawng ṭha ṭhin chu vanneihthlak a tih thu a sawi a; Champhai tui tlan ber Tuipui tuihna a ṭhat ṭhin thu an sawi chu hmuh theihin a kiam chak hle tih sawiin, "Phai ram aiin ruahtui dawn leh tuihna neihah vannei zawk angin lang mah ila, kum 20 hnuah chuan hetiang reng hi a nih tawh dawn lo. Kan tu leh fate'n min dem lohna turin kan pên chhuah tak tak a hun a ni," a ti.

Bawrhsap chuan, tui mamawhna avangin lei hnuai tui lakna Champhai leilet phaizawlah siam mek a nih thu a sawi a; rally chuan mi tin rilruah tui tlan hnár tihfai leh ruahtui khâwl nachang hriat kawngah harhna thlen se a duh thu a sawi bawk.

Rally-ah hian kal khawmte chuan Tuipui lui hnár dung tluan an zawh a, tuihna humhalh kawnga hmalak ngaite an enfiah a ni. Bawrhsap chuan Tuipui hnár, Khankawn-Zotlang inkara leivûng paih vanga harsatna awm theite leh Tuipui kama awm ran talhna in sakte khawtlang hruaitute nen an enfiah nghal a ni.