ZPM party-in lawmthu an sawi

Zoram Peoples' Movement (ZPM) party chuan thuchhuah siamin, Pathian zarah Serchhip biala Assembly by-election-ah tluang taka vote thlak zawh a ni chu lawmawm an tih thu an tarlang.

ZPM chuan, inthlan avanga hun, thâ leh zung leh sum leh pái thawhtu te, Mizoram chhung leh páwna ZPM tana ṭhahnemngai taka ṭawngṭaipuitu te, hmun hrang hranga duhsaktute chungah lawmthu an sawi a, "ZPM General Headquarters chuan lawmthu kan sawi tak zet a. Pathian zarah hnehna kan chan ngei kan beisei," an ti.

Serchhip biala ZPM hruaitute thawhrimna leh inpekna fakawm an tih thu sawiin, "Thawhhona ṭha tak hnuaia inthlan tluang leh ṭha taka min tlingtlakpui thei hi kan chhuang tak zet a ni," an ti a; Serchhip bial mipui leh inthlannaa mawhphurtu official te, MPF leh ZPM candidate vote-tute zawng zawng chungah an lawm tak zet thu an tarlang bawk.