Vawk damdawi atan purûn sen finfiahna awm lo

Tunlaia Mizoram hmun hrang hranga vawk natna, African Swine Fever léngah, damdawi atan purûn sen a ṭha nia sawi awm chu finfiahna awm lo a nih thu, AH&Vety department-a doctor-te chuan an sawi.

Vawk damlo tan purûn sen a ṭha nia sawi chu social media-ah a darh nasa hman a; thingtlang khaw ṭhenkhatah chuan vawk vulhtute'n purunsen an lei nasa hle niin khaw ṭhenkhata VC-te chuan Vanglaini palai an hrilh.

Lungsen VC-II president R Lalthianghlima chuan, an khuaa Pu Dala’n vawk damlo tan purûn sen a pe tih a sawi chungchangah, a upat deuh tawh avangin a inah amah a zawhfiah thu a sawi a; Dala chuan, 'Kum 1980 vela vawk hri léngah kha chuan BSF ho chaw ningnáwia purûn sen tam tak ka pe a. Khatih laia vawk hri léng lakah chuan an himdam a. Mahse, tunah chuan kan vawk pawhin chaw an ei duh lo,' tiin a lo hrilh tih a sawi a ni.

Lungsen Hmarveng YMA vice president ZD Lalhuapzauva chuan, "Vawk hian hri an kài tawh chuan eng pawh pe ila, awmzia a awm lo," a ti a; Lungsen nu pakhat pawhin, purûn sen a lei chu a her dip a, a tui chu vawk damlo káah inchiuna (syringe)-in kâp lut mah se, a thi tho tih a sawi.

AH&Vety department hotute chuan, vawk damlo tana purûn sen pek a ṭha nia sawi chu sawifiahin, "Medical-ah finfiahna a awm lo. Purûn sen pêk hian vawkah harsatna a thlen chuang lo a, an fimkhur vanga him rih ni maiah kan ngai," an ti.

Lungsen khua vil tura sorkarin a tirh vety doctor-te pawhin, Pu Dala vawk-in chu hri lèn hma aṭang tawha enkawl uluk a nih thu leh ni tin tihfai ṭhin a nih thu an sawi a; purûn sen chu chaw ningnawiah a awm thu leh chutiang pe ṭhinte vawk chu a thih tho thu sawiin, "Purûn sen vang chauha dam an ni lo ang," an ti. ASF chu boruaka léng a nih loh thu an sawi bawk.