PMGSY kawng leh kuhva rah sawiho

Khawzawl bawrhsap Zothanmawia hoin district-a sorkar thuneitute chu April 17, Inrinni khan DC pisa conference hall-ah an ṭhukhawm a; Khawzawl district-a PMGSY kawng laih leh kuhva phurh chungchang an ngaihtuah.

Ṭhutkhawmah hian an district chhung khaw hrang hranga PMGSY hnuaia kawng laih mekte dinhmun an thlir a; PMGSY project chu March 31, 2022-ah a tàwp dawn avangin chak zawka hmalak a nih theih nan hmalak dan tur rêl a ni.

Dan loa Myanmar aṭanga kuhva rah leh bungraw dang Khawzawl district kaltlanga phurh luh ṭhinin PMGSY hnuaia kawng laih mek tibuaiin a timuang a, kawng laih sa a tihchhiat bakah, Covid-19 tihdarhna hmanrua a nih theih thu tarlan a ni.

Khawzawl district-a khaw hrang hrangin an khaw paltlanga kuhva rah phur kal ṭhin chu an duh loh thu tarlan a ni bawk. Dan loa kuhva rah lak luh, Khawzawl district kaltlang ṭhin chu tihtawp a nih theih nan ṭan rual an rél a ni.