NLUP Kûta sum sen zat Rs. 1,61,16,939 : Kolasib district-in sum hman bân an pe kîr
Kum 2018-a Congress kaihhruai sorkara flagship programme NLUP Kûtpui neihna atana district hrang hranga sum sên zat a hriat kim a ni ta a, sum sên zawng zawng chu Rs. 1,61,16,939 a ni. Kolasib district chuan NLUP Kûtpui buatsaihna atana sum an dawn zinga an hman bângte chu NLUP Implementing Board (NIB)-ah an pe kîr.
NLUP Kûtpuia sum hman zat chu RTI Act hmangin zawh a ni a, district ṭhenkhatin hun tiam - ni 30 chhunga an chhàn hman laiin, district pali - Serchhip, Kolasib, Lawngtlai leh Mamit district-te chuan NIB-ah an pek tlai avangin NIB chuan zawhna thehluh aṭanga thla hnih leh ni li hnu, March 14, 2019 khan chhanna a pe chhuak kim chauh a ni.
Kolasib district chuan NLUP Kût hi May 30-31, 2018 khan an hmang a; NLUP line department pariat tan Rs. 5,85,359 hman niin, DC Office bikin Rs. 1,35,175 an hmang a, a vaiin Rs. 7,19,114 hman ral a ni. NIB aṭanga sum an dawn zat erawh chu Rs. 10,00,000 a ni a, Rs. 2,80,886 an hman bâng a, chu'ngte chu Kolasib DC office-in NIB-ah cheque hmangin an pe kîr leh vek tih an tarlang.
Serchhip district-ah chuan May 30-31 chhungin NLUP Kûtpui hman a ni a, NIB aṭangin sum an dawn nuai 10 chu an hmang zo vek. Sum hmanna hlawm lian chi ruk an nei a, chungte chu - NLUP stall sak nan Rs. 5,06,000, line department-te hnena pek Rs. 4,07,317, VIP leh sorkar official-te food & lodging atan Rs. 55,670, special item titute lawmman atan Rs. 7,000, meeting atan Rs. 7,820 leh, sound system, certificate, banner & official badge atan Rs. 12,000-te a ni.
Lawngtlai district-in zawhna an chhannaah NLUP Kûtpui an hman ní tarlan a ni lo a, NIB aṭanga sum an hmuh Rs. 10,00,000 chu an hmang zo. Sum hmanna hlawm lian chi 14 a awm a, NLUP line department-te tan Rs. 3,94,400 hman niin, sum hmanna hlawm lian ber a ni.
Mamit district chuan June 13-14 chhungin NLUP Kûtpui an hmang a, an sum dawn Rs. 10,00,000 an hmang zo. Pawisa hmanna hlawm lian 14 a awm a, sum hmanna tam ber chu line department pariatte hnena pek a ni.
