AYF-te'n Global Youth Day hmang
Seventhday Adventist kohhran ṭhalai, Adventist Youth Federation (AYF)-te chuan March 16, Inrinni khan khawvel hmun danga mite rualin Mizoram hmun hrang hrangah Global Youth Day an hmang a; thupui chu 'Be the sermon' tih niin, mi dangte tana thil tih ṭha tihna hun atan an hmang.
Aizawlah chuan Global Youth Day hi AYF Aizawl East leh West-te'n a huhoin an hmang a; zing karah Hmangaihte Rûn, Sunshine Children’s Home, Muanna In, Jeriko Khualbuk De-addiction Centre, Samaritan Riangvai Rûn, Gan Sabra leh Old Age Home-te tlawhin thilpek an hlan.
Chhunah Aizawl Civil Hospital-ah blood donation camp an nei a; ACH OPD leh Casualty-ah tui in tur leh hriselna thuziakte an sem bakah, Dinthar kâwnah free health check-up an buatsaih. Chawhnuah Dawrpui Multipurpose Hall-ah joint fellowship an hmang bawk.
Lungleia AYF-te chuan Bethel Centre tlawhin, buhfai eng emaw zat an pe a, chawhnuah Bazar biak-inah joint fellowship an hmang. Thenzawl AYF-te'n khualzinte hnenah ei leh in tur an sem a, AYF KLS branch-te'n State Referral Hospital tlawhin, khualzinte tan in leh ei tur an sem. Mizorama AYF branch dang 14-te pawh an awmna hmun ṭheuhah mi dangte tan an che chhuak a ni.
Global Youth Day hi USA-a General Conference of Seventhday Adventist Youth Department kaihruainain kum 2013-ah khawvel pumah hman ṭan a ni.