Candidate tur pathum chiang tawh

April 11, 2019-a Lok Sabha inthlan­pui awm turah Mizoram aṭanga seat pakhat chuh turin mi pathumin candidate an nih tur thu an tichiang tawh a, candidate siam tum, an candidate tur la puang lo an awm.

Mizoram state-a sorkarna chelhtu MNF chuan an candidate tur an puang tawh a, MNF ticket hian C Lalro­sanga, Tuikual North a ding dawn. Zoram Peoples' Movement (ZPM) leh Cong­ress party chuan candidate inṭâwm siamin, mipui candidate tiin an vuah a, mipui candidate atana an thlan chu Lalnghinglova Hmar, Aizawl Venglai a ni.

Lalhriatrenga Chhangte, Kulikawn pawhin thuthar thehdarhtute a kawmnaah, independent-a a din dawn tur thu a lo puang tawh a ni.

PRISM party chuan Lok Sabha-ah candidate neih an tum thu an puang tawh a, mahse, an candidate tur an la puang lo. NPP pawhin candidate neih an tum thu an lo sawi tawh a, mahse, candidate an nei ngei dawn em tih erawh hriat a ni rih lo.