TDS sût a nih loh chuan YMA-in March 20 aṭangin SBI dang dawn

Central YMA Exe­cutive Committee chu March 16, Inrinni khan CYMA Committee Room-a an ṭhukhawm a, NGO Coordination Committee-in Tax De­ducted at Source (TDS) sût a nih loh chuan State Bank of India (SBI)-a thawkte dang tura thutlukna an siam chu an thláwp a, March 20 aṭangin SBI-a thawkte dan ni se, an ti.

CYMA chuan, SBI-a thawkte dan an nih theihna atan theihtawp chhuah an rêl a; YMA sub-headquarters, group leh branch-te chu anmahni huam chhung ṭheuha SBI branch-te March 20 aṭanga a ṭul anga hna thawk thei loa dang turin an ti a ni. Aizawl khawpui bikah chuan, city branch YMA-te March 19 zanah hmalak dan tur hrilhfiah an ni ang.

Tax De­ducted at Source hnuaiah Mizo tri­bal, Mizorama chengte hnenah income tax dik lo taka lak tum a nia sawiin CYMA chuan, "Hei hi hriat­thiam har kan ti. India sorkar leh SBI hotute he thil hi siamṭha nghal turin kan phût a ni. Ram leh hnam humhalhna atan theihtawp chhuah tur leh TDS do tura ṭangrual vek turin Mizo mipui kan ngen a ni," an ti.