KHAWTHLIR

Thisen pe
Inrinni khan Bethlehem Vengthlang Branch YMA chuan Aizawl Civil Hospital tan thisen unit 66 an pe a, petute mipa 58 leh hmeichhia pariat an ni a; Chanmari Branch KṬP-in an diamond jubilee pualin Synod Hospital tan thisen unit 54 an pe a, a petute mipa 46 leh hmeichhia pariat an ni. LIKBK Ṭhalai Pawl Lawngtlai Chandmary bialte'n Lawngtlai District Hospital tan unit 29 pein, mipa 23 leh hmeichhia paruk an ni a; Kolasib-a Seventhday Adventist ṭhalaite mipa 20 leh hmeichhia pariatte'n Kolasib District Hospital-ah unit 28 an pe. Muallungthu Branch KṬP-ten MIMER-ah unit 25 an pe a, a petute mipa 22 leh hmeichhia pathum an ni.

Airport chei thatna
Assembly budget session neih mekah PWD changtu chief minister Zoramthanga chuan Congress Legislature Party group leader Zodintluanga Ralte zawhna ziaka chhangin, kum 2018-19 ah Lengpui Airport chei ṭhatna atan cheng vbc. 11 dah a nih thu a tarlang. Chief Minister tarlan danin, cheng vbc. 11 chu pek chhuah a la ni lo a, kum 2019-10 atan chuan pawisa dah belh a ni lo.

MBOCWWB sum sem
Mizoram Building & Other Construction Workers Welfare Board chuan an hnuaia inziak lutte hnenah an fate sikul kaina senso tur sum an sem. MBOCWWB-ah hian kum 18 aṭanga 60 inkar, building leh a kaihhnawih construction work-a thawkte an inziak lut thei a, hamṭhatna awm zingah, Board-a inziak lut fa, zirlai mi pahnih tan Children Educational Assistance pek theih a ni.

Zirlai chawimawi
Mizo Zirlai Pawl (MZP), Ailawng Branch chuan Inrinni khan Khuangchera Hall, Ailawngah an khuaa zirlai ti ṭhate chawimawina hun an hmang a, MNF treasurer Vanlalzawma'n a hmanpui. Vanlalzawma chuan, zirlai nih laia chak ber leh huai berte chu an ṭhan len hnuah an lal ber kher lo tih sawiin, "Lehkhathiam leh a ti ṭha peih peihte an thuin an lal zel tawh a ni," a ti. Zirtirtute pawh inthlahdah lo a, naupang mize mila zirtir kawngah theihtawp chhuah zel turin a fuih a ni.