World Consumer Rights Day hman a ni

March 15, 2019 khan Lung­lei District Consumers Asso­ciation leh Lunglei College NSS buatsaihin Lunglei Col­lege conference hall-ah World Con­sumer Rights Day hman a ni a, additional DC Benjamin Lalzama'n a hmanpui. Cham­phaiah pawh Champhai College multipurpose hall-ah World Consumer Rights Day hman a ni bawk.

Lunglei DC Benjamin Lal­zama chuan, mipuite'n dikna leh chanvo an neih rualin, mawh­phurna an nei tih an hriat a ngaih thu a sawi a, "Khawl changkang, smartphone-te hman hi kan dikna chanvo a nih rualin, social media-a thu dik lo vawr darhh a hlauawm a, inbumna laka fimkhur a ngaih bawk a ni," a ti.

Kumina World Consumer Rights Day thupui chu 'Trusted smart products' tih a ni a, thupui hi Lungleia Day hmannaah chuan Lunglei College-a associate professor Dr F Lalchhanhima'n a sawi a ni.

Champhaiah chuan World Consumer Rights Day hi Champhai District Consumers Association bultumin Champhai College multipurpose hall-ah hman a ni a, Champhai additional DC Liansangzuala Chhakchhuak-in a hmanpui.

Liansangzuala Chhakchhuak chuan, consumer-te dikna chhuhsak a ni ṭhin chu a vei thu leh engtiang taka do let tur nge tih consumer-te'n an hre tâwk lo chu pawi a tih thu a sawi a; thil zuartute'n an thil zawrhte maximum retailed price (MRP) aia toa an hralh khaop a nih thu sawiin, MRP aia sanga zuarte chu dan bawhchhia, man theih an nih thu sawiin, "Gas leh electric bill chungchangah pawh, kan hman nen inmil lo uchuak taka to bill kan dawnte hi an complaint hreh loh tur a ni," a ti.

Champhaia Legal Metrology inspector Lalnundanga pawhin, mobile network leh cement man chungchang chu comsumer-te'n an ngaihtuah chian a ṭul thu a sawi a; India ram chhungah cement bag khat Rs. 390 vel a nih laiin, Mizoramah chuan Rs. 500 chuang a nih thu a sawi a, thil dik lo hria chuan Legal Metrology-ah complaint theih reng a nih thu a sawi bawk.