NLUP ṭanpuina pek loh 2,794 an awm : A dawng tawhte chhuhsak an ni dawn lo - CM

Agriculture minister C Lalrinsanga chuan NLUP dawng tura thlan tawh, sum pek hman loh chhungkua 2,794 an awm thu a sawi. NLUP chungchangah chief minister Zoramthanga chuan, NLUP kalpui chhunzawm a nih tawh loh tur thu a sawi rualin, ṭanpuina sum dawng tawhte chu chhuhsak an nih dawn loh thu Assembly House a hrilh.

ZPM member Vanlalhlana zawhna chhangin C Lalrinsanga chuan, NLUP dawng tura thlan tawh, ṭanpuina la pek loh chhungkua 2,794-te chu ṭanpuina pek an nih dawn leh dawn loh chungchangah, sorkarin ngaihtuahna a sen mek thu a sawi.

INC member Zodintluanga chuan NLUP hnuaia ṭanpuina dawngtu, an bank account-a sum thunsak tawh eng emaw zat chu MNF sorkar tharin a lak letsak nia sawiin, chu'ng mite chu sorkarin sum pek leh a tum leh tum loh a zawt a; Agriculture Minister chuan, "Account-a lut tawh ho kha chu sorkar tharah SEDP-ah kalpui tum a ni a, SEDP Apex body-in a la ngaihtuah chhunzawm ang," a ti.

C Lalrinsanga chuan, NLUP ṭanpuina dawng hnuhnungte chu NLUP-NEDP con­vergence hnuaia awm, a hnukhawi an nia sawiin, "SEDP han kalpui ta ila, a tlar hmasaah an awm tho awm e," a ti a; exit protocol kalpui mek a ni a, exit protocol hmangin uluk takin ruahmanna kalpui a nih thu a sawi.

NLUP chungchangah hian House leader Zoramthanga, chief minister chuan, a thlawna sum sem ringawt chu ṭha an tih loh avangin NLUP chu sem chhunzawm an tum loh thu a sawi chiang a, "Project connected SEDP kalpui kan tum avangin, tuna a dawng tawh chu a dawng tawh an ni mai a, a bak hi chu, NLUP kalpui kan tum tawh lo a, chumi aiah exit protocol kan ti a, SEDP kalpui kan tum zawk a ni," a ti.

NLUP dawngtu bank account-a lut tawh chhuhsak leh chhuhsak loh chungchangah Chief Minister chuan, "An account-a lut tawh na nâ nã chu kan chhuhsak lo ang, an nei ang," tiin a chhang.