CAB do tura candidate ka ni - Lalnghinglova Hmar

April 11, 2019-a Lok Sabha inthlanpui neih tura mipui can­didate tia vuah Lalnghinglova Hmar chuan nimin khan Aizawl district-a hmar tlangdung khaw eng emaw zat a fang a; The Citizenship (Amendment) Bill (CAB) do turin MP candidate ni turin thutlukna a siam tih a sawi.

ZPM leh Congress party thlâwp Lalnghinglova Hmar chuan, politician nih duh ngai lo a nih thu a sawi rualin, "Ṭhiante zarah mi hriat ka lo hlawh ve a ni ang, MLA inthlan pawh khan min sáwm ve hlawm a, tuna kan khingpui ber MNF pawhin min sáwm a, an MLA pahnih an rawn kal a ni. Mahse, ka duh lo. Tuna MP candidate ka nih duh tâkna chhan ber chu CAB do ka duh vang a ni," a ti.

CAB chu Mizoramin a duh lo a, NGO-te'n a theihtawpin an dodal tih sawiin Lalnghinglova chuan, "CAB hlauhawmzia awlsam taka sawina atan chuan, ram dang cheng Hindu-ho awlsam taka India leh Mizoram khua leh tui nihtir theihna a ni," a ti. Hmarchhak mipuite'n nasa takin do mah se, BJP kaihhruai sorkarin CAB chu Lok Sabha-ah an pass lui a, Rajya Sabha-ah erawh chuan dodalna a nasat em avangin pharh a ni ta lo tih sawiin, Mizoram mipui leh kohhrante lawmthu sawiin an ṭawngṭai hial tih a sawi.

February thlaa BJP president Amit Shah-a'n Assam-a thu a sawiah, BJP/NDA-in sorkarna an siam leh chuan CAB tharthawha kaltlangpui ngei an tum thu sawiin Tetea Hmar chuan, "Hmarchhak mipuite min zah lo hle," a ti. Lok Sahba-a Mizote'n aiawh an neihchhun chu BJP lamṭang a nih a rem lo tih sawiin, "Kan elpui MNF-te hi an sual, an ṭha lo ka ti lo, mahse, BJP kaihhruai NDA thlawptute an ni," a ti.

MP leh MLA inthlan a inang lo tih sawiin Lalnghinglova chuan, "State-ah chuan ruling an awm tawh, tunah chuan Central-a ruling tur kan thlang dawn. Mizo mipuite BJP kaihhruai ni lo sorkar siam tura min pui turin ka sawm che u a ni," a ti a; state-a ruling nih leh nih loh chu MP-ah danglamna a awm lo tih a sawi.

Lalnghinglova Hmar chuan, a theihna a san ber lai, a ṭhat lai leh chak lai ngeiin ram tana zau zawka thawk tura pên chhuak a nih thu sawiin, "Lok Sabha MP pakhat kan neih chhun hi pensioner tan chauh kan dah dawn em ni? Kei aia ṭhalai fel zawk pawh an awm ang, a bul ka ṭan dawn a ni. Theihtawpa ram leh hnam tana thawh hi ka thil tum a ni," a ti.

MP candidate Lalnghinglova Hmar hi MLA inthlan neih zawh tâka Tuivawl biala INC candidate RL Pianmawia leh ZPM candidate K Romawia ten an ṭawiawm a ni.