Gas man tihto bik thu sorkarin a hre lo Assembly House-ah sawi chhuah a ni

Nimina Assembly session-ah ZPM member Dr Vanlalthlana'n Ram­hlun Sports Complex veng chuan hnuai lam­ah eirawngbawlna gas man, bûr pakhatah Rs. 10 zela tihto bik a nih thu a sawi a; hei hi sor­karin a hriatpui loh thu, Food, Civil Supplies and Consumer Affairs (FCSCA) minister K Lalrinliana chuan sawiin, "LPG distributor hian eng dan hmangin nge a man a tihsan sorkarin a hriatpui lo," a ti.

Dr Vanlalthlana chuan, LPG distributor-in Ramhlun Sports Complex venga gas bur khat man Rs. 10-a an lo tihto ngawt chu dan kalh a nih thu leh Assembly House-ah hial sawi chhuah a nih phah thu sawiin, sorkarin hmalak zui a tum dan a zawt a; Minister chuan, "Dan lo a ni a, House-ah sawi chuah a nih tawh chuan kan lo en zui ang," a ti a; mipuiin gas bûr khatah Rs. 10 zel an lo chawi tawh ṭhin chu sorkarin a hriatpui loh avangin sorkarin mipui hnenah pek let tumna a nei lo tih a sawi.

LPG distributor-te'n company hnena report an pek ang taka consu­mer-te in kawta gas an pek (home delivery) loh chhan zawhna chhangin K Lalrinliana chuan, "Sorkarin mipui tana awlsam zawk leh remchang zawk nia a ngaih avangin tuna gas sem dan, common deli­very point hi distri­butor-te'n an kalpui a ni," a ti.

Gas home delivery chu dana awm, gas distributor-te an tih ngei tur a nih thu sawiin Dr Vanlalthlana chuan, home delivery an tih hma chuan MLA a nih chhung chu Assembly House-ah au chhuahpui a tum thu a sawi. Hemi chungchangah hian FCSCA Minister chuan, gas distributor-te'n harsatna sawi tur an ngah thu a sawi rualin, "An tih ngei tur pawh a ni a. Ṭan kan lo la zel ang," tiin a chhang.

Supply Minister chuan, Consumer Welfare Fund atan sorkar laipui aṭangin kum 2014-15 leh kum 2015-16 chhungin cheng nuai 20 ve ve dawn a nih thu a tarlang a; District Consumer Forum tihchangtlunna atan kum 2014-15 chhungin Rs. 14,45,000, kum 2015-15 ah Rs. 12,90,000, kum 2016-17 ah Rs. 1,50,000, kum 2017-18 ah Rs. 1,50,000 dawn a ni a, a vaiin Rs. 30,35,000 dawn a ni tih a sawi.

Aizawl District Con­sumer Forum President ruat chungchangah Mi­nister cvhuan, FCSCA department-in January 14, 2019-ah advertisement tih a ni a, mahse, diltu an awm loh avangin hmalak zui zel a nih thu House a hrilh.

LPG chu online boo­king titute'n an lak theih loh thu sawiin Dr Vanlalthlana chuan, online-a book-tute'n an lak theih hun tur a zawt a; minister K Lalrinliana chuan, "Kan lo en zui ang," tiin a chhang. Gas connection thar latute hnenah distributor ṭhen­khatin tihluihnain gas stove an leitir ṭhin leh connection ṭhenkhatah cash memo pek chhuah a nih loh thu sawi chhuah chu FCSCA department-in an hriat loh thu a sawi.

Dr Vanlalthlana chuan, gas chu consumer-te'n an lak dawnah bûk ngei tur a nih laiin, bûk a nih ngai loh thu te, tuna gas sem mekah distributor-te'n consumer card photo copy an phût tel ṭhin chu FCSCA department tih loh tur a nih thu hriattirna a chhuah hnuah pawh distributor-te'n an la phut reng thu a sawi a; "Eng chin nge dan kenkawh a nih dawn?" tiin a zawt. FCSCA Minister chuan, an lo en zui tur thuin a chháng a ni.